ВМРО-ДПМНЕ преку соопштение соопшти дека Владата во изминатите две години презела низа мерки со кои, како што наведува, значително е подобрена состојбата во земјоделството и обезбедена поголема поддршка за земјоделците.
Од партијата посочуваат дека по преземањето на власта затекнале заостанати исплати на субвенции, вклучително и кај производителите на млеко, како и нерешени проблеми во ЈП „Национални шуми“, каде, според нив, повеќе од 1.600 вработени биле без плати и без здравствено и пензиско осигурување.
Според ВМРО-ДПМНЕ, во изминатите две години биле исплатени над 15 милијарди денари субвенции, а во првите месеци од мандатот биле исплатени околу 4 милијарди денари заостанати обврски.
Од партијата наведуваат дека субвенциите во сточарството се зголемени за 50 проценти, а со укинување на двојното пријавување биле спречени околу 7.000 земјоделци да останат без финансиска поддршка.
Во соопштението се истакнува и дека се зголемени откупните цени на тутунот, донесена е методологија за пресметка на производната цена на винското грозје, а лозарите добиле повисоки откупни цени.
ВМРО-ДПМНЕ додава дека се одобрени 117 проекти за млади земјоделци, склучени се договори за набавка на специјализирана земјоделска механизација, а земјоделското производство и извозот бележат раст.
Од партијата оценуваат дека земјоделството денес е сектор во кој повторно се инвестира и најавуваат дека ќе продолжат со мерките за финансиска поддршка, зголемување на производството и подобрување на животниот стандард на земјоделците.
