Со минута молк и звуците на камбаните, денеска во италијанскиот град Аматриче беа одбележани десет години од разорниот земјотрес во кој загинаа 239 жители.
Минутата молк започна во 3:36 часот наутро, во моментот кога на 24 август 2016 година земјотрес со јачина од 6,2 степени го погоди градот и за само неколку секунди речиси целосно го уништи неговото историско јадро.
Италијанската премиерка Џорџа Мелони денеска ќе го посети Аматриче, каде што ќе присуствува на комеморацијата и ќе положи венци во спомен на жртвите. Таа порача дека ноќта на 24 август 2016 година „никогаш нема да биде заборавена“, но призна и дека обновата на градот се одвива потешко и побавно од очекуваното.
Во серијата земјотреси што го погодија централниот дел на Италија загинаа речиси 300 луѓе, а неколку стотици беа повредени. Илјадници жители останаа без своите домови, а потресите продолжија и во следните месеци.
Десет години подоцна, урнатините и градилиштата сè уште се дел од пејзажот на Аматриче. Многу жители и натаму живеат во привремено сместување, а според официјалните податоци обновени се помалку од 40 отсто од оштетените објекти.
И покрај милијардите евра државна помош вложени во обновата, процесот се одвива бавно, оставајќи го градот и неговите жители со последиците од катастрофата и една деценија подоцна.
