Во август одобрени 333 градежни проекти, вредноста на градбите над 350 милиони евра

Градежната активност во Македонија бележи значителен раст, покажуваат најновите податоци на Државниот завод за статистика. Во август биле издадени 333 одобренија за градење, што е за 18,9 отсто повеќе во споредба со истиот месец минатата година. Со нив е предвидена изградба на 1.030 станови, додека вкупната вредност на планираните градежни работи достигнала 21,7 милијарди денари, односно повеќе од 350 милиони евра.

Најголем дел од одобренијата се однесуваат на Скопскиот Регион, каде што се регистрирани 105 од вкупно 333 дозволи.

— реклама —

Според намената, 224 одобренија, односно 67,3 отсто, се за високоградба. За реконструкции се издадени 91 одобрение, што претставува 27,3 отсто од вкупниот број, додека преостанатите 18 дозволи се однесуваат на нискоградба.

— реклама —

Планираните 1.030 станови ќе зафаќаат вкупна корисна површина од 80.530 квадратни метри.

Вредноста на предвидените градежни работи е зголемена за 315,5 отсто во споредба со август минатата година. Од Државниот завод за статистика појаснуваат дека значителниот раст главно се должи на одобрението за изградба на делницата од автопатот А4, која го поврзува граничниот премин Блаце со Скопје.

— реклама —

Овој инфраструктурен проект значително ја зголемил вкупната вредност на августовските одобренија за градење.

Податоците покажуваат дека физичките лица и натаму имаат најголем удел во бројот на одобренија. Од вкупниот број, 231 проект, или 69,4 отсто, се иницирани од физички лица, додека 102 проекти, односно 30,6 отсто, се на компании и други деловни субјекти.

Иако компаниите учествуваат во реализацијата на поголемите станбени и инфраструктурни проекти, индивидуалната изградба на семејни куќи и доградбите и натаму претставуваат значаен дел од градежната активност.