Француските власти почнаа да спроведуваат засилен болнички карантин за лицата идентификувани како контакти на случаи со хантавирус, пренесува БФМ ТВ.
Францускиот министер за одбрана Себастијан Лекорни вчера изјавил дека „сите контактни случаи, без исклучок“, ќе бидат сместени во засилен карантин во болнички услови.
Според медиумите, дел од изолацијата започнала уште во понеделникот вечерта, додека останатите контакти ќе бидат префрлени во изолација во текот на денешниот ден.
Контактните случаи се следат во повеќе региони на Франција, а целта е нивно згрижување во најблиските центри за заразни болести.
Еден случај веќе е потврден во Бретања, каде што лицето прво било во самоизолација во департманот Финистер, а потоа било префрлено во Универзитетската болница во Рен.
Според протоколот на Светската здравствена организација, карантинот трае 42 дена.
Мерката се однесува на вкупно 22 идентификувани контактни случаи во Франција.
Осум лица биле на летот од Света Елена до Јоханесбург на 25 април, со кој патувал и патник од холандскиот крузер кој починал по инфекција со хантавирус.
Француската влада соопштила дека сите брзо биле изолирани и тестирани, а резултатите засега се негативни.
Преостанатите 14 контакти биле идентификувани на летот меѓу Јоханесбург и Амстердам.
Најпрво им била наредена самоизолација, по што владата одлучила сите да бидат опфатени со засилен карантин.
Француската влада најави дека секојдневно ќе се одржуваат два меѓуресорски состаноци посветени на хантавирусот.
Првиот состанок ќе се одржува во утринските часови и ќе биде фокусиран на погодените региони и хоспитализираните контакти, додека вториот ќе се одржува попладне.
