Од Општина Ѓорче Петров соопштуваат дека продолжуваат со реализација на инфраструктурни проекти, при што во тек е изградба на седум приклучни улици со вкупна должина од околу 1.700 метри.
Од општината информираат дека со зафатите значително ќе се подобрат локалната патна мрежа, безбедноста и пристапноста во повеќе населени места.
Меѓу улиците опфатени со проектот е и улицата 102, каде се врши целосна реконструкција и уредување на коловозот.
Александар Стојкоски, градоначалник на Општина Ѓорче Петров, изјави дека инвестициите во локалната инфраструктура остануваат еден од главните приоритети на општината.
„Нашата цел е јасна – модерно, уредено и функционално Ѓорче Петров, каде граѓаните ќе имаат достоинствени услови за живот“, изјави Стојкоски.
Од општината најавуваат дека и во наредниот период ќе продолжи реализацијата на инфраструктурни проекти со фокус на рамномерен развој и подобрување на условите за живот во сите населени места.
