Околу 3.000 првачиња помалку ќе има во новата учебна година, најави Јаневска

Министерката за образование и наука Весна Јаневска предупреди дека во учебната 2026/2027 година се очекува да има најмалку 3.000 првачиња помалку во споредба со минатата година, оценувајќи дека трендот на намалување на бројот на ученици е загрижувачки.

— реклама —

На прес-конференција, на која беа презентирани резултатите од државната матура, Јаневска рече дека во моментов бројот на запишани првачиња е за околу 4.900 помал од лани, но очекува дел од децата дополнително да се запишат во наредниот период.

— реклама —

„Во овој момент бројката е 4.900 првачиња помалку од лани. Но, ќе се дозапишуваат и во овој период. Бројката ќе стигне најмногу до 3.000. Значи, сигурно ќе имаме 3.000 првачиња помалку од лани“, изјави Јаневска.

Таа информираше и дека просечната оценка на државната матура годинава изнесува 3,66.

— реклама —

„Со ваквиот успех сме многу задоволни. Тој е речиси на нивото на минатогодишниот просек од 3,69 и е подобар од оној во 2024 година, кога просечната оценка беше 3,26“, рече министерката.

Јаневска посочи дека годинава матурата се полагала според нов модел, со кој, како што рече, сите ученици биле ставени во рамноправна положба, бидејќи одговарале на прашања од материјалот што го изучувале во текот на образованието. Според неа, подобрените резултати се должат на ангажманот на образовниот систем, учениците и тестаторите.