Во Србија уапсен и директорот на Хидрометеоролошкиот завод

Во Белград, по налог на Вишото јавно обвинителство, е уапсен директорот на Републичкиот хидрометеоролошки завод на Србија (РХМЗ), Југослав Николиќ (71), заедно со уште две лица.

Тие се осомничени дека во периодот од ноември 2019 до ноември 2024 година пренесувале и прикривале имот во вредност од најмалку 650.000 евра, знаејќи дека потекнува од криминални активности, со цел да го прикријат неговото потекло.

— реклама —

Апсењето е уште едно во низата по изборната победа на студентската листа и поразот на листата предводена од Александар Вучиќ.

Според сомневањата на обвинителството, Николиќ на своите банкарски сметки уплатил 41,9 милиони динари (околу 356.200 евра), 43.150 евра и 44.760 швајцарски франци, за кои немал покритие во законските приходи.

— реклама —

Со тие пари, како што се сомнева обвинителството, купувал недвижности во Белград, Ужице и Црна Гора.

Тој се товари и дека не ја пријавил во Агенцијата за спречување корупција важната промена во својот имот, иако како јавен функционер бил должен да го стори тоа.

О. Н. (71) е осомничена дека во периодот од 2021 до 2023 година пренела најмалку 227.548 евра за купување станови, гаражно место и деловен простор во Чачак и Црна Гора.

— реклама —

Ѓ. Н. (45) се сомничи дека во 2021 година уплатил најмалку 1,5 милиони динари за купување стан во Црна Гора.

Обвинителството се сомнева и дека Николиќ и О. Н. во ноември 2024 година, со договор за распределба на имотот, ги пренеле на Ѓ. Н. сопственичките права на повеќе станови, гаражни места, земјишни парцели и деловен простор во Чачак и Црна Гора.

— реклама —

На сите тројца осомничени им е одредено задржување до 48 часа. Во тој рок треба да бидат приведени на сослушување во Вишото јавно обвинителство во Белград.

Станува збор за сомневања на обвинителството, кои не претставуваат доказ за вина.