Во Торино утре нов протест против високите трошоци за живот и вооружувањето

Нов протест против високите трошоци за живот, војната и зголеменото вооружување ќе се одржи утре во италијанскиот град Торино. Демонстрантите ќе изразат незадоволство и од високите кирии, како и од намалувањето на средствата за образование и здравство.

— реклама —

Собирот е закажан за 15 часот на плоштадот „Пјаца Кастело“, од каде што учесниците ќе продолжат низ главните градски улици до плоштадот „Пјаца Криспи“. Протестот беше најавен за време на денешниот собир во кампусот „Луиџи Еинауди“, кој е под окупација од 26 октомври, а на кој учествуваа студенти, синдикалци и претставници на различни граѓански организации.

— реклама —

Организаторите најавија дека протестните активности ќе продолжат и во наредните недели. Собирот е пријавен во полицијата и ќе се одржи истовремено со слични активности во Џенова, Фиренца, Болоња, Удине и Лече.

Учество најавиле повеќе студентски здруженија, а меѓу организаторите е и мрежата „Торино на плоштадите“, која ги координира различните организации вклучени во протестите. Се очекува протестните активности да се прошират и во други универзитетски објекти во Торино, меѓу кои и „Палацо Нуово“, по претходните окупации на високообразовни установи, објави АНСА.

— реклама —

Масовниот бран протести во Торино започна во првите денови од октомври, кога средношколци почнаа да блокираат и окупираат училишта низ градот, барајќи подобра инфраструктура и услови за образование. Во средината на месецот беше организиран голем координиран марш на илјадници студенти и професори, кој беше проследен со сериозни судири со полицијата на плоштадот „Кастело“.

— реклама —

Нов масовен протест против високите трошоци за живот и вооружувањето се одржа и на 24 октомври, кога повторно избувнаа жестоки судири меѓу демонстрантите и полицијата.