СДСМ преку соопштение обвини дека премиерот Христијан Мицкоски изнесува невистини во однос на исплатата на субвенциите за земјоделците, посочувајќи дека официјалните податоци покажуваат оти во периодот на нивното владеење биле исплатени значително повеќе средства отколку во изминатите две години.
Од партијата во соопштението тврдат дека во периодот од 2021 година до средината на 2024 година биле исплатени вкупно 30 милијарди денари субвенции за земјоделците.
„Во последните две години од мандатот на СДСМ се исплатени 20 милијарди денари, а во време на ВМРО-ДПМНЕ, за две години, само 15 милијарди денари. Не може помалку да биде повеќе, ниту обратно“, наведуваат од СДСМ, посочувајќи дека овие податоци се јавно достапни преку Платежната агенција.
Во соопштението се осврнуваат и на откупната цена на тутунот, оценувајќи дека и во овој сегмент бројките ги демантираат тврдењата на актуелната власт.
Според СДСМ, во 2013 година, за време на владеењето на ВМРО-ДПМНЕ, просечната откупна цена на тутунот изнесувала 153 денари за килограм, додека во 2024 година достигнала 400 денари.
„Субвенцијата за прва класа изнесуваше 100 денари, а ВМРО-ДПМНЕ сега ја намали на 80 денари. Како може помалку да биде повеќе? Не може“, наведуваат од партијата.
СДСМ обвинува и дека исплатата на субвенциите доцни во сите гранки на земјоделството, при што, според нив, без финансиска поддршка останале поледелците среде жетва, градинарите и тутунарите.
Во соопштението се посочува дека сточарите сè уште ги очекуваат субвенциите за добиток и премиите за млеко, додека истовремено се соочуваат со ниски откупни цени и прекин на откупот.
„Не се лажат земјоделците кои секојдневно трпат загуби поради погубните политики на ВМРО-ДПМНЕ. Вистината е дека за две години Мицкоски како цунами го уништи земјоделството“, се наведува во соопштението на СДСМ.
