Во пресрет на одбележувањето на годишнината од воено-полициската операција „Бура“, во Хрватска беше запалено српско знаме, пренесува хрватскиот портал „Индекс“.
Според порталот, снимката ја испратиле читатели, а на неа се гледа како две маскирани лица, облечени во црно, се качуваат на надвозник во близина на Оточац, поставуваат српско знаме и потоа го палат.
Покрај знамето бил поставен и транспарент со натпис: „Благодарност за сè, ние сме слободни луѓе, Бура '95“.
Операцијата „Бура“ започна на 4 август 1995 година. Во Хрватска се одбележува како Ден на победата, додека во Србија се одбележува како Ден на сеќавање на егзодусот на српското население. Според податоците на организациите што ги документираат воените жртви, за време и по операцијата повеќе стотици цивили биле убиени, а околу 200.000 Срби ја напуштиле Хрватска.
