Водачот на бунтовниците забрани пукање во воздух во Сирија, најави трансфер на власта

Сириската бунтовничка коалиција денеска соопшти дека работи на трансфер на власта во Сирија на преодно административно тело со целосни извршни овластувања и дека сириските државни институции ќе бидат предводени од премиерот Мохамед Џалали додека не им бидат предадени на новите власти.

„Големата сириска револуција премина од фазата на борба за соборување на режимот на Асад во борба за заедничка изградба на Сирија што е достојна за жртвите на нејзиниот народ“, се додава во соопштението на коалицијата.

— реклама —

Водачот на бунтовниците Абу Мохамед ал Голани, сигнализирајќи ги напорите да се обезбеди уредна транзиција откако бунтовниците го прогласија падот на режимот на Башар ал Асад, најави дека сириските државни институции ќе бидат надгледувани од премиерот до предавањето на власта.

Потпишан со неговото вистинско име, Ахмед ал Шара, изјавата на Голани им забранува на воените сили во Дамаск да се приближуваат до јавните објекти и забранува пукање со оружје во воздух.

— реклама —

Во интервју за Ал Арабија, Џалали, кој беше назначен за премиер од Асад во септември, рече дека бил во контакт со Шара за да разговара за управувањето со земјата за време на периодот на транзиција и рече дека Сирија треба да одржи слободни избори.

Џалали рече дека останува во својот дом и дека е подготвен да го поддржи континуитетот на државното управување.

— реклама —

Сирискиот министер за телекомуникации Еџад ал-Катиб, во интервју за Ал Арабија, рече дека бил контактиран од претставник на бунтовниците одговорен за телекомуникациските услуги. Тие се согласија дека телекомуникациите и интернетот ќе продолжат да функционираат, рече Катиб.

„Вистинското прашање е колку оваа транзиција ќе биде уредна, и се чини сосема јасно дека Голани многу сака таа да биде уредна“, рече Џошуа Лендис, експерт за Сирија и директор на Центарот за блискоисточни студии на Универзитетот во Оклахома.

Голаните нема да сакаат да се повтори хаосот што го зафати Ирак откако силите предводени од САД го соборија Садам Хусеин во 2003 година.

Некои Сиријци и понатаму се плашат дека бунтовничката коалиција ќе наметне драконско исламистичко владеење или ќе предизвика одмазда.