ЈП „Водовод и канализација“ – Скопје продолжува со секојдневните контроли на квалитетот и безбедноста на водата за пиење, а последните анализи покажуваат дека водата од скопскиот водоснабдителен систем ги исполнува пропишаните стандарди.
Во текот на 26 август, Секторот за санитарна контрола при претпријатието зел 44 примероци од водоводната мрежа на град Скопје, од кои четири биле од бунарскиот потег Нерези–Лепенец.
Од „Водовод и канализација“ информираат дека мониторингот се спроведува согласно Правилникот за барања за безбедност и квалитет на водата за пиење, како и според соодветните стандарди за земање примероци од водоводните дистрибутивни системи.
На сите земени примероци се вршат физичко-хемиски и микробиолошки анализи во акредитираните лаборатории при Секторот за санитарна контрола, согласно стандардот ISO 17025:2018.
Според добиените резултати, сите испитани примероци од водоснабдителниот систем на град Скопје одговараат на пропишаните барања за безбедност и квалитет на водата за пиење.
Од јавното претпријатие посочуваат дека контролите продолжуваат во рамки на редовниот мониторинг, со цел навремено да се следи квалитетот и безбедноста на водата што ја користат скопјани.
