Анкица Стојановска-Митровска соопшти дека Апелацискиот суд донел пресуда со која се потврдува мобингот што, според неа, бил вршен врз неа од страна на управителот на Алфа ТВ, Јани Бојаџи.
„Правдата е понекогаш бавна, но секого го стигнува. Конечно една голема неправда која ми беше направена, денеска доби позитивен епилог. Посебно се радувам на пресудата на Апелација во која се потврди мобингот“, напиша Стојановска-Митровска.
Таа тврди дека била изложена на психичка тортура, изолација, прераспределување на фиктивна работна позиција, како и добивање работни задачи кои, според неа, биле бесмислени и без оправданост.
Во објавата наведува дека на крајот, како што вели, била „нечовечки и со обезбедување“ избркана од медиумот во кој работела 13 години, од кои последните четири на позицијата програмски директор.
