Белгиско средно училиште од септември воведува нов предмет посветен на безбедноста, во чии рамки учениците ќе учат за геополитика, радикализација, конфликти, заштита на податоци, право и етика.
Предметот „Размислување за безбедноста“ ќе се изучува еднаш неделно во средното училиште „Heilige-Drievuldigheids College“ во Левен, а ќе биде наменет за учениците од трета година на насоката за спортски науки. Училиштето ќе биде прво во Белгија што воведува ваква програма, пренесува VRT.
Во наставата ќе учествуваат припадници на белгиската армија и локалната полиција, кои на учениците ќе им предаваат за различни безбедносни предизвици и начини на нивно разбирање.
Директорот на училиштето, Франк Бајенс, објаснува дека целта не е учениците да се подготвуваат за воена кариера, туку да стекнат знаења што ќе им помогнат самостојно да размислуваат и да формираат ставови за безбедносните прашања.
И покрај тоа што во програмата ќе учествуваат војници, учениците нема да учат како да ракуваат со оружје, ниту пак ќе имаат обука за самоодбрана.
Идејата за воведување на предметот се појавила пред околу три години, а училиштето во реализацијата добило поддршка од Министерството за одбрана, локалната полиција и покраинските власти.
Поголемиот дел од учениците позитивно ја прифатиле новината, но дел од родителите изразиле загриженост дека ваквата настава би можела да поттикне „воена реторика“.
Директорот, сепак, вели дека намерата е токму спротивна – преку подобро разбирање на безбедносните прашања, младите да стекнат знаење и самостојно да изградат сопствено мислење.
