Вонредна состојба во Русија по пукање на брана, жители евакуирани

Вонредна состојба е прогласена во Славјанскиот округ во Краснодарскиот крај на Русија откако дошло до пукање на брана на реката Кубан, поради што биле активирани сирени за тревога и спроведена евакуација на населението од загрозените подрачја.

— реклама —

Според локалните служби за вонредни состојби, оштетувањето на браната во близина на населбата Нефтјаник достигнува ширина од околу 25 до 30 метри, создавајќи опасност за блиските населени места, меѓу кои и селото Урма.

— реклама —

Жителите биле навремено предупредени, а дел од евакуираните се сместени во привремени прифатни центри.

На терен се ангажирани неколку стотици спасувачи и десетици специјални возила и машини. Во обид да се спречи понатамошно ширење на водата, поставени се десетици илјади вреќи со песок и изградени се заштитни насипи.

— реклама —

Првичните проценки покажуваат дека водата не навлегла во станбените објекти, туку предизвикала поплавување на земјоделски површини. Надлежните соопштија дека нивото на реката почнало постепено да се намалува.

— реклама —

Пријавени се и помали оштетувања на други локации во регионот, но засега нема информации за загрозени животи или поголема материјална штета.