Возеле со 154 и 151 км/ч, полицаец ги „казнил“ со предупредување и 45 евра – заработи кривична пријава

Кривична пријава е поднесена против полициски службеник од Тетово, осомничен дека не ги санкционирал соодветно двајца возачи кои возеле со брзина од 154 и 151 километар на час на пат каде што дозволената брзина била 100 километри на час. Наместо предвидените казни од по 300 евра, едниот возач добил само писмено предупредување, а другиот казна од 45 евра.

Од Министерството за внатрешни работи информираат дека Одделот за внатрешна контрола, криминалистички истраги и професионални стандарди поднел кривична пријава против К.С., полициски службеник во Полициската станица за безбедност на патниот сообраќај Тетово, поради сомнение за „злоупотреба на службената положба и овластување“ и „несовесно работење во службата“.

— реклама —

Според МВР, случајот се случил на 2 февруари 2025 година, кога друг полициски службеник со радар измерил дека две возила се движат со брзина од 154 и 151 километар на час, по што го известил К.С. за да ги запре.

— реклама —

Пријавениот ги запрел возилата и ги идентификувал возачите, но, како што наведуваат од МВР, не постапил согласно законските одредби.

На едниот возач му издал писмено предупредување за сторен сообраќаен прекршок, додека на другиот му издал прекршочен платен налог со глоба од 45 евра.

— реклама —

Според МВР, за двата прекршоци требало да бидат издадени прекршочни платни налози со глоби од по 300 евра во денарска противвредност, согласно Законот за безбедност на сообраќајот на патиштата.

— реклама —

Со ваквото постапување, според сомневањата на внатрешната контрола, полицискиот службеник им овозможил на двајцата возачи да избегнат соодветно санкционирање и да се стекнат со поповолна правна положба.

Кривичната пријава е доставена до Основното јавно обвинителство за гонење организиран криминал и корупција, односно до специјализираното одделение за кривични дела сторени од лица со полициски овластувања и припадници на затворската полиција.