Возила за разбивање демонстрации влегоа во центарот на Белград на изборниот ден

Повеќе специјални возила на српската Жандармерија, наменети за разбивање демонстрации и потиснување толпи, денеска се забележани во центарот на Белград, додека во Србија се одржуваат предвремените парламентарни избори, јавува телевизијата Н1.

— реклама —

Возилата биле снимени на раскрсницата меѓу улиците „Кнез Милош“ и „Крал Милан“, кај Лондон, од каде што се упатиле кон Теразие. За нивно поминување била отворена полициската блокада со која претходно бил запрен сообраќајот на дел од улицата „Кнез Милош“.

Според информации што граѓани ги доставиле до Н1, претходно во текот на денот на автопатот Белград – Ниш била забележана колона од околу 20 возила на Жандармеријата, кои се движеле во правец кон српската престолнина.

— реклама —

Станува збор за возила од ист тип како оние што биле користени за време на протестите во Нови Сад во летото 2025 година, кога припадници на Жандармеријата ги користеле за потиснување демонстранти од булеварите и пошироките градски улици.

— реклама —

Присуството на специјалните возила доаѓа во период кога дел од центарот на Белград е затворен за сообраќај, а околу седиштето на Републичката изборна комисија, на улицата „Крал Милан“, се поставени заштитни огради и е забележано засилено полициско присуство.

Засега нема официјално објаснување за распоредувањето на овие возила, ниту информации дека денеска биле употребени против демонстранти.

Избирачките места во Србија се отворени до 20 часот, по што се очекуваат првите резултати од гласањето.