Прашањето за полагањето на правосудниот испит на албански јазик ќе биде решено на системски начин, а во иднина и сите професионални испити ќе можат да се полагаат на албански јазик, соопштија од коалицијата ВРЕДИ.
Оттаму упатија критики кон ДУИ, обвинувајќи ја партијата дека со години не презела конкретни чекори за решавање на проблемот со кој се соочуваат албанските студенти.
„Министерството за правда премина од еден кадар на ДУИ кај друг. По Блерим Беџети, кој беше министер повеќе од илјада дена, дојде Аднан Јашари. Имаше мандат, имаше надлежности и можност да го реши ова прашање, но немаше волја за албанските студенти. За Албанците имаше чекање, а за своите предност“, наведуваат од ВРЕДИ.
Оттаму потсетуваат и на случајот со синот на поранешниот собраниски претседател Талат Џафери, тврдејќи дека системот функционирал кога станувало збор за блиски лица на функционери, додека барањата на студентите останувале нерешени.
Реакцијата следува по повеќемесечните протести на албанските студенти, кои од април годинава организираат протестни маршеви, барајќи да им биде овозможено полагање на правосудниот испит на албански јазик, повикувајќи се на Законот за употреба на јазиците.
Ова прашање беше тема и на средбата меѓу премиерот Христијан Мицкоски и лидерите на ВРЕДИ, на која било констатирано дека институциите веќе работат на решение кое ќе биде усогласено со Уставот и со законската рамка.
Претходно, лидерите на ВРЕДИ, Изет Меџити и Билал Касами, преку социјалните мрежи најавија дека наскоро ќе биде овозможено полагање на правосудниот испит на албански јазик.
„Правосудниот испит на албански јазик е само почеток. Наша цел е сите професионални испити да можат да се полагаат и на албански јазик. Албанците повеќе не сакаат врева, туку конкретни решенија“, порачаа од ВРЕДИ.
