Претседателот на Србија, Александар Вучиќ, повторно се осврна на случајот со неговиот син Данило, на кого во минатото му бил забранет влез во Црна Гора.
„Дали знаете дека мојот син беше протеран три години, односно му беше забранет влез?“, рекол Вучиќ, пренесуваат црногорските медиуми.
Забраната за влез на Данило Вучиќ во Црна Гора била укината во ноември 2021 година, кога црногорската полиција соопштила дека мерката е повлечена за 18 странски државјани, иако, како што било наведено, за неа немало законски причини.
Два дена подоцна, белградскиот весник „Данас“ објавил дека на синот на српскиот претседател му бил забранет влез во Црна Гора од март 2020 година поради наводни врски со навивачки и радикално-националистички групи, како и со лица од безбедносен интерес и криминални структури.
Вучиќ тогаш изјавил дека не знаел дека на неговиот син му бил забранет влез во Црна Гора и дека ниту тој ниту Данило официјално не биле информирани за тоа.
Тој тогаш оставил можност мерката да била поврзана со фактот што неговиот син двапати бил на судење, додавајќи дека можеби некој сакал да испита како ќе реагираат кон српскиот претседател.
