Вучиќ најави нови иновативни лекови за деца и возрасни во Србија

Србија наскоро ќе добие дополнителни иновативни лекови наменети за деца и возрасни, вклучително и терапии за ретки болести, најави српскиот претседател Александар Вучиќ.

— реклама —

Во обраќање на социјалната мрежа ТикТок, Вучиќ најави дека во наредните денови ќе соопшти кои нови лекови ќе бидат достапни. Тој посочи дека со нив ќе се олесни лекувањето на децата и возрасните на кои им се потребни вакви терапии.

Претходно, во текот на годината, Вучиќ најави дека во октомври 2026 година во српските болници треба да пристигнат нови иновативни лекови за лекување на рак, за што државата планира да издвои околу 100 милиони евра.

— реклама —

Според неговите најави, новите терапии ќе бидат наменети за пациенти со различни видови рак, меѓу кои рак на дојка, белите дробови, црниот дроб и мочниот меур. Вучиќ истакна дека лековите не можат да гарантираат спасување на секој пациент, но можат да дадат надеж и значително да придонесат за продолжување и подобрување на животот.

— реклама —

Тој потсети и на претходните мерки со кои во Србија беа намалени цените на одредени лекови. Од почетокот на август поевтиниле лекови за спречување на згрутчувањето на крвта и за лекување на срцева слабост, кои се издаваат исклучиво на рецепт.

Вучиќ наведе дека речиси 2.000 луѓе веќе доставиле рецепти за лекови чии цени од 17 август биле намалени двојно или повеќе. Според него, се очекува бројот на пациентите што ќе ги користат лековите по новите цени да биде трипати поголем.

Српскиот претседател посочи дека воведувањето на новите терапии ќе го олесни лекувањето на пациентите и ќе им ја олесни работата на лекарите и медицинскиот персонал. Оваа најава ја даде и при обиколката на градежните работи на детската клиника „Тиршова 2“.