Вучиќ отвори тајна фабрика за дронови, со Израелците планира уште три

Србија планира да изгради најмалку уште три фабрики за производство на дронови во соработка со израелски партнери, најави српскиот претседател Александар Вучиќ при отворањето на нова фабрика за склопување дронови во Србија.

— реклама —

Вучиќ рече дека, поради доверливоста на производниот процес, новинарите не биле поканети на отворањето и разгледувањето на фабриката. Подоцна објасни дека за две од трите планирани нови фабрики веќе се определени локации, а сите три ќе бидат во близина на аеродроми. Локацијата на новоотворената фабрика не е објавена, освен што е наведено дека се наоѓа во рамките на военоиндустриски комплекс.

— реклама —

Вучиќ најави и дека Србија заедно со израелските партнери работи на создавање „дигитална армија“. Според него, целта на развојот на воените капацитети е Србија да ја зачува стабилноста и да има поголема способност за одвраќање на потенцијални напади.

Најавата доаѓа во период кога Вучиќ активно учествува во кампањата пред предвремените парламентарни избори, закажани за 25 октомври. Тој најави дека на 27 септември ќе поднесе оставка од функцијата претседател и како граѓанин ќе ја продолжи кампањата. Вучиќ очекува по изборите да стане премиер доколку победи листата на Српската напредна странка, чиј носител е тој.

— реклама —

Соработката меѓу Србија и Израел во военоиндустрискиот сектор претходно беше предмет на истражувања на Балканската истражувачка мрежа (БИРН) и израелскиот весник „Хаарец“. Тие објавија дека Србија договорила производство на дронови на своја територија со израелската воена компанија „Елбит системс“.

Србија и Израел имаат развиена соработка и во областа на трговијата со оружје. Според претходно објавените податоци, извозот на оружје и муниција од Србија во Израел значително се зголемил од 2023 година.