Претседателот на Србија, Александар Вучиќ, повторно најави дека во недела, 27 септември, ќе поднесе оставка од функцијата претседател на Србија, по што планира да се вклучи во кампањата за предвремените парламентарни избори закажани за 25 октомври.
„Во недела на 27-ми поднесувам оставка“, изјави Вучиќ утрово во интервју за Радио Белград.
Вучиќ оставката ја најави и минатата недела, кога рече дека по неа во предизборната кампања ќе влезе „како обичен граѓанин“. РТС на 14 септември објави дека тој планира да поднесе оставка на функцијата претседател на 27 септември.
Вучиќ денеска најави и големи кадровски промени доколку политичкиот блок што го предводи добие поддршка на парламентарните избори.
„Ако се случи да ја добиеме довербата од граѓаните, тоа би биле големи промени: најмногу 12 министри“, рече тој.
Тој уште на почетокот на септември изјави дека сака да биде кандидат за премиер и дека, доколку добие поддршка по изборите, би формирал „најмала влада во историјата на Србија“, со премиер и најмногу 12 министри.
Изборната листа „Александар Вучиќ – Обединета Србија“ веќе е прогласена за парламентарните избори на 25 октомври.
Вучиќ најави и промени меѓу локалните функционери поврзани со неговата политичка опција.
„Ќе дадам сè од себе најмалку 50 отсто од градоначалниците и претседателите на општините да бидат сменети три месеци по формирањето на Владата“, рече тој.
Како причина го наведе незадоволството од односот на дел од локалните функционери кон граѓаните.
„Тие луѓе не сакаа да ги слушаат своите сограѓани, повеќе размислуваа за себе, а не за нив“, рече Вучиќ.
