„Вучиќ заслужено заврши на буништето на историјата“ – остра порака од носителот на студентската листа

Носителот на студентската изборна листа „Студентите победуваат“, Илија Срдановиќ, изјави дека очекувале ваков исход од парламентарните избори во Србија, нагласувајќи дека довербата на граѓаните ја стекнале преку непосредни средби и разговори во текот на изборната кампања.

Во изјава за црногорскиот медиум „Вијести“, Срдановиќ порача дека студентското движење успеало да ги препознае проблемите на граѓаните и нивните барања да ги преточи во изборната програма.

— реклама —

„Во текот на целата кампања бевме во директен контакт со граѓаните. Нè запознаа лично и ни кажаа што им недостига. Тие насоки ги внесовме во нашата програма, а тие ни поверуваа. Знаевме и постојано истакнувавме дека исходот ќе биде токму ваков“, изјави Срдановиќ.

— реклама —

Тој упати и остра порака до Александар Вучиќ, кој го призна изборниот пораз, оценувајќи дека со тоа завршува една долга политичка етапа во Србија.

„Замислете колку е убедлива таа победа кога човекот што повеќе од деценија и пол ја завиваше Србија во црно заслужено заврши на буништето на историјата“, рече Срдановиќ.

— реклама —

Сепак, тој нагласи дека студентската листа сака вниманието да го насочи кон идните политички приоритети, наместо кон поразените политички противници.

„Но, нема да зборуваме за тоа. Ќе градиме подобра Србија за доброто на нашите граѓани, за подобри односи со соседите и со целата меѓународна заедница. Ви благодарам на сите“, порача Срдановиќ.

Неговата изјава следува по прогласувањето победа од студентската листа на предвремените парламентарни избори и признавањето на поразот од страна на Вучиќ. Конечните изборни резултати сè уште треба да бидат потврдени од Републичката изборна комисија.