Претседателот на Србија, Александар Вучиќ, денеска ќе го прими украинскиот претседател Володимир Зеленски, кој престојува во официјална посета на Србија.
Како што соопшти Службата за соработка со медиумите на претседателот на Србија, за 10:30 часот е предвидена свечена церемонија на пречек пред Палатата „Србија“, по што во 10:45 часот ќе се одржи тет-а-тет средба меѓу Вучиќ и Зеленски.
За 11:15 часот е закажан состанок на делегациите на двете земји, предводени од претседателите на Србија и Украина.
Во 12:00 часот е предвидено потпишување на Меморандум за разбирање меѓу Министерството за земјоделство, шумарство и водостопанство на Србија и Државната служба на Украина за безбедност на храната и заштита на потрошувачите, за соработка во областа на здравјето на животните и безбедноста на храната.
По потпишувањето, во 12:05 часот, Вучиќ и Зеленски ќе дадат изјави за медиумите.
Вучиќ во четвртокот изјави дека на средбата со Зеленски ќе бидат разгледани неколку важни теми, меѓу кои европскиот пат на Украина и Србија, билатералната економска соработка и енергетската соработка.
„Доаѓа во прва билатерална посета претседателот на Украина. Досега имавме пет или шест средби, главно на различни самити и конференции. Имаме неколку важни теми. Едната е европскиот пат на Украина и Србија, бидејќи приближно се наоѓаме во слична ситуација и се соочуваме со исти или слични проблеми на европскиот пат“, рече Вучиќ.
