Претседателот на Србија, Александар Вучиќ, изјави дека парламентарните избори ќе бидат распишани во септември или на почетокот на октомври, повторувајќи дека ќе се одржат до крајот на 2026 година.
По средбата со чешкиот премиер Андреј Бабиш, Вучиќ, одговарајќи на новинарско прашање, рече дека постапката за распишување на изборите не зависи само од него.
„Не можам тоа да го направам сам. Ќе го направам откако Владата ќе го извести Собранието. Очекувано е изборите да се одржат во октомври или ноември, што значи дека ќе бидат распишани во септември или на почетокот на октомври. Веќе кажав дека изборите ќе се одржат до крајот на 2026 година. Го одржувам зборот и на народот е да ја искаже својата волја“, изјави Вучиќ.
Тој додаде дека Србија сигурно ќе одржи парламентарни избори до крајот на годината, додека претседателските избори, според него, ќе следуваат нешто подоцна.
