Српскиот претседател Александар Вучиќ изрази надеж дека претстојниот самит во Тиват ќе донесе позитивни сигнали за европската интеграција на Србија и можни промени во пристапниот процес кон Европската Унија.
По средбата со претседателот на Европскиот совет, Антонио Кошта, Вучиќ изјави дека Белград има големи очекувања од самитот и дека се надева на промени во методологијата на пристапување.
„Се надеваме дека ќе има најава за некаква промена во методологијата, но мора да работиме напорно. Затоа е формиран тим, предводен од Данијела Апостоловиќ, кој работи секој ден“, изјави Вучиќ.
Тој посочи дека очекува разбирање од европските претставници за незадоволството во Србија поради тоа што земјата веќе пет години нема отворено ниту еден нов преговарачки кластер.
„Се надевам дека Кошта ги разбира нашите фрустрации што не сме отвориле ниту еден кластер пет години, поради конфликтот во Украина. Но, се надевам дека доаѓаат подобри времиња“, рече српскиот претседател.
Вучиќ нагласи и дека економските врски со Европската Унија остануваат исклучително важни за Србија. Како пример го посочи зголемениот извоз благодарение на Stellantis, што, според него, позитивно влијае врз економскиот раст и бруто-домашниот производ.
„Шеесет проценти од нашата трговија се одвива со Европската Унија, а тие се убедливо најголемите инвеститори во нашата земја“, додаде Вучиќ.
На крајот од своето обраќање, тој се пошегува со Кошта, алудирајќи на неодамнешните политички полемики во регионот.
„Се гледаме вечерва во Црна Гора, ако не претставувам хибридна закана“, му порача Вучиќ на Кошта.
