Претседателот на Србија, Александар Вучиќ, заедно со претседателот на Сојузот на независни социјалдемократи, Милорад Додик, го посети манастирот Рмањ, каде што ги пречека епископот бихаќко-петровачки и рмањски Сергиј, пренесува српски медиум.
За време на посетата, владиката Сергиј му се заблагодари на Вучиќ за поддршката што Србија ја обезбедила за обновата на манастирот, оценувајќи дека посетата ќе остане запаметена во историјата на ова православно светилиште и на целиот крај.
Вучиќ истакна дека Србија ќе продолжи да ги финансира проектите во Босански Петровац и обновата на манастирот Рмањ.
„Ако се потребни средства, тоа ќе го решиме. Ова е многу важно за нашиот народ во Бихаќко-петровачката епархија“, рече српскиот претседател.
Тој нагласи дека економскиот развој и отворањето работни места се клучни за опстанокот на српското население во овој дел на Босна и Херцеговина, посочувајќи го примерот со компанијата „Јумко“ во Дрвар.
„Важно е луѓето да работат. Само така ќе можат да останат и да опстанат во своите места“, изјави Вучиќ.
Осврнувајќи се на политичката состојба во Босански Петровац, Вучиќ оцени дека српските меѓусебни поделби довеле до губење на локалната власт, додека Додик истакна дека српската заедница во меѓувреме повторно се консолидирала.
Српскиот претседател зборуваше и за последиците од војните во деведесеттите години, наведувајќи дека во голем број населени места денес речиси и да нема жители.
„Војната им донесе несреќа на сите народи“, порача Вучиќ.
Тој нагласи дека Србија ќе продолжи да ги поддржува црквите и манастирите, бидејќи тие имаат важна улога во зачувувањето на српската заедница.
„Не ни требаат војни, народот ќе го зачуваме со мудрост, работа и економски развој“, рече Вучиќ.
Во своето обраќање тој повторно истакна дека Србите не треба да се делат според државите во кои живеат.
„Не постојат босански или хрватски Срби, постојат само Срби. Сите сме Срби“, изјави Вучиќ.
На крајот од посетата најави дека Србија ќе продолжи да инвестира во проекти во српските средини во Босна и Херцеговина, посочувајќи дека досега за различни проекти се издвоени 142 милиони евра, без последните десет милиони евра наменети за изградба на автопат.
