Претседателот на Србија, Александар Вучиќ, остро реагираше на изјавата на известувачот на Европскиот парламент за Србија, Тонино Пицула, кој неговиот режим го нарече „главен извор на нестабилност во Србија и регионот“.
Вучиќ изјави дека му е доволно да ја види „сликата на Пицула со калашников во рацете“ за да разбере за што станува збор, оценувајќи ги неговите изјави како „кратки и глупави“. Според него, дел од европските претставници „измислуваат работи“ за Србија и имаат цел да ја ослабат државата.
Тој ги даде изјавите за новинарите во Шантили, Франција, каде што учествува на меѓународна конференција за глобална политика. Во првичните извештаи беше наведено дека Вучиќ го навредил Пицула, но подоцна беше појаснето дека дел од навредите се однесувале на новинарот Домагој Маргетиќ.
Во исто време, Вучиќ упати и критики кон Европската Унија, оценувајќи дека Европа заостанува зад САД и Кина во технологијата, роботиката и вештачката интелигенција. Тој порача дека Унијата треба поагресивно да го шири своето глобално влијание, особено во Африка и Азија.
Зборувајќи за позицијата на Србија, Вучиќ повторно го нагласи прашањето за Косово, тврдејќи дека дел од меѓународната заедница не го почитува територијалниот интегритет на Србија. Тој додаде дека земјата не може да се откаже од своите ставови, но дека останува отворена за европска интеграција, иако смета дека понудите што ѝ се даваат не се реални.
