Претседателот на Србија, Александар Вучиќ, изјави дека ќе се обиде правно да му помогне на човекот кој беше уапсен под сомнение дека преку социјалните мрежи му упатувал закани со смрт.
Како што пренесува „Данас“, Вучиќ на својот профил на „Инстаграм“ порача дека ќе изјави оти не се чувствува загрозен, бидејќи тоа би можело да влијае на постапката против осомничениот.
„Јас не сум обвинител, ниту сум судија и, колку и да е одвратно да се слуша ова, ќе се обидам да му помогнам. Ќе кажам дека не се чувствувам загрозен, а тоа ќе му помогне во постапката. Сигурен сум дека во него се крие добар домаќин, добар Шумадиец, кого некој го завел со морничави невистини“, изјави Вучиќ.
Тој оцени дека заканите се резултат на манипулации од оние кои, според него, сакале да ја поделат Србија.
Српската полиција го уапси 55-годишниот жител на Крагуевац, со иницијали С.С., кој е осомничен дека на својот профил на „Фејсбук“ објавил видео во кое, држејќи нож, директно му се заканувал со смрт на Вучиќ и на главниот и одговорен уредник на весникот „Информер“, Драган Ј. Вучиќевиќ.
Осомничениот се товари за кривичното дело „загрозување на сигурноста“, а одреден му е притвор до 48 часа, по што ќе биде изведен пред надлежното обвинителство.
