Српскиот претседател Александар Вучиќ изјави дека тврдењата за наводна употреба на „звучен топ“ за време на протестите во Србија се целосна измислица и дека надлежните органи знаат од каде потекнала таа приказна.
Говорејќи пред медиумите по отворањето на XXI Светски конгрес на економисти на Меѓународната економска асоцијација, Вучиќ рече дека не сака да коментира поединечни медиумски написи, нагласувајќи дека најважна му е вистината.
„Денес видов дека и медиумите блиски до опозицијата велат дека станува збор за измислица. Таа приказна се туркаше цела година“, изјави Вучиќ.
Тој оцени дека опозициските кругови и дел од медиумите водат кампања заснована на, како што рече, „ширење омраза и невистини“, бидејќи, според него, немаат аргументи против резултатите на актуелната власт.
„Звучен топ во употреба немаше и сите што зборуваат за тоа знаат дека не постоел, но сакаат да ја убедат јавноста дека бил употребен“, рече Вучиќ.
Српскиот претседател повторно повика на меѓународна истрага, наведувајќи дека Србија е подготвена да прифати истрага од која било релевантна странска служба.
„Ги повикуваме и американските и европските служби, како и сите други релевантни институции. Кој и да дојде, ќе утврди дека немало употреба на звучен топ“, истакна Вучиќ.
Тој додаде дека државните органи располагаат со информации за тоа од кого потекнала приказната за наводниот звучен топ, но нагласи дека со тоа прашање ќе се занимаваат надлежните институции.
