Србија ќе произведува дронови во соработка со Израел, а претседателот Александар Вучиќ оцени дека проектот ќе придонесе земјата да стане „воена сила“.
Обраќајќи им се на граѓаните во Белегиш, Вучиќ рече дека производството на дроновите ќе се одвива во Србија и дека станува збор за српски производ.
„Тоа ќе бидат наши дронови и поради тоа ќе бидеме воена сила“, порача Вучиќ, одговарајќи на критиките за одлуката Србија да произведува беспилотни летала со израелски компании.
Тој оцени дека соработката со Израел е добра за Србија бидејќи, како што наведе, израелските компании произведуваат едни од најдобрите дронови во светот.
Вучиќ додаде дека Србија мора да има силна армија за да може да го заштити населението и територијата.
„Мора да бидеме силни за да го зачуваме нашиот народ и да ја чуваме нашата земја“, рече српскиот претседател.
Тој се осврна и на критиките од политичките противници, наведувајќи дека одлуката за производство на дронови ја смета за стратешки важна.
Вучиќ претходно најави дека фабриката за производство на дронови со израелска технологија би требало да биде отворена во Србија во текот на септември. Засега не се објавени детали за нејзината локација, производствениот капацитет или конкретните модели што ќе се произведуваат.
