Србија се соочува со сериозни последици од екстремните горештини и сушата, а претседателот Александар Вучиќ предупреди дека дополнителното намалување на нивото на Дунав би можело да предизвика големи проблеми.
Тој изјави дека состојбата е особено тешка во Војводина, каде што сушата најсилно ги погодува земјоделството и водоснабдувањето.
„Ако нивото на Дунав падне за уште 30 сантиметри, готово е. Во земјите што имаат нуклеарни централи зависни од нивото на водата, проблемот е уште поголем. Кај нас најтешка е состојбата во Војводина, особено во делови од Банат, каде што речиси и да нема дожд“, изјави Вучиќ.
Тој предупреди дека Србија ја очекуваат уште десет дена екстремно високи температури, што дополнително ќе ја зголеми потрошувачката на електрична енергија поради користењето на клима-уредите.
Во меѓувреме, поради нискиот водостој на Дунав, на повеќе делови од реката се појавија карпи, песочни насипи и стари бродоломи, а метеоролозите најавуваат дека без значителни врнежи нивото на реката ќе продолжи да опаѓа.
