Србија ќе продолжи да води независна надворешна политика и покрај различните притисоци, порача денес српскиот претседател Александар Вучиќ, кој истакна дека Белград не се откажува ниту од соработката со Западот, ниту од пријателството со Русија.
Коментирајќи ја посетата на украинскиот претседател Володимир Зеленски на Србија, Вучиќ рече дека неговото доаѓање не значело никаква загуба за земјата. Тој истакна дека Србија продолжува да соработува со Кина и со САД, но и дека не сака да го наруши пријателството што го има со Русија.
Во врска со критиките дека Србија не може да води независна политика и дека се обидува да балансира меѓу различни страни, Вучиќ порача дека таквиот курс ќе продолжи.
„Никаде не ја преминав границата на нашата политика, што ја воспоставивме за време на состанокот со Зеленски. Нема да бидам ничија марионета“, рече Вучиќ.
Тој додаде дека Србија не сака да ѝ служи на ниту една голема сила.
„Не сакам никому да му служам, ниту на Англија, ниту на Германија, ниту на Америка, ниту на Русија“, порача српскиот претседател.
Вучиќ истакна и дека Украина никогаш не била непријател на Србија и дека станува збор за земја која го поддржува територијалниот интегритет на Србија.
На прашањето за критиките дека Србија „седи на повеќе од едно столче“, Вучиќ одговори: „Ние имаме само свое столче“.
