Вучиќ: „Светот се наоѓа на работ на многу поголема војна“

Српскиот претседател Александар Вучиќ предупреди дека светот се наоѓа на почетокот на поголема војна и оцени дека постои опасност од многу поширок конфликт.

— реклама —

„Ако ме прашате што лично мислам, а нема да објаснувам зошто така мислам, мислам дека сме на почетокот на поголема војна. Затоа се надевав дека некој досега ќе направи нешто за да создаде мир. Тоа не се случи и нема да се случи наскоро. Тоа значи дека сме на работ на многу, многу поголема војна. Мразам што го велам ова“, изјави Вучиќ во подкастот „MD MEETS“, кој го води директорот на „Аксел Шпрингер“, Матијас Депфнер.

Одговарајќи на прашањето дали светот се наоѓа на почетокот на поголем конфликт или можна војна меѓу Европа и авторитарните сили, како Русија, Вучиќ зборувал и за идниот распоред на силите во светот.

— реклама —

Тој оцени дека државите во иднина ќе се стремат кон поголема независност и намалување на зависноста од други земји. Според него, САД и Кина ќе останат две големи сили, додека Европската Унија би требало да се наметне како трет столб на глобалниот поредок.

— реклама —

„Не сум сигурен дали Европа ќе може, и се надевам дека ќе може, да се воспостави како трет столб. Четврто, ќе ги имате Русија, Индија и други огромни континентални или регионални сили“, рече српскиот претседател.

Вучиќ смета дека новиот сојуз меѓу Турција, Пакистан и Саудиска Арабија дополнително ќе влијае врз глобалните поделби и ќе создаде поинаква политичка атмосфера во светот.

— реклама —

Говорејќи за тоа како би можел да изгледа светот за пет години, тој оцени дека државите и натаму ќе бидат во процес на дефинирање на своите односи, но со „подеструктивни средства“ од оние што се користат денес.