Државниот завод за ревизија соопшти дека неговиот сервер бил цел на сајбер-напад, при што од официјалната електронска адреса на директорот, Максим Ацевски, се испраќаат фишинг, односно измамнички пораки.
Како што информираат од Заводот, сомнителните пораки се испраќаат до приматели низ Македонија, но и до меѓународни соработници на институцијата. Оттаму апелираат граѓаните и институциите да не ги отвораат овие пораки и да не кликнуваат на линковите што ги содржат.
Од Државниот завод за ревизија посочуваат дека информатичкиот сектор веќе работи на отстранување на проблемот, а случајот е пријавен и во Министерството за внатрешни работи.
Во меѓувреме, веб-страницата на Заводот функционира непречено и на неа продолжуваат да се објавуваат ревизорски извештаи.
Пред неколку дена и Министерството за внатрешни работи предупреди на зачестени фишинг измами преку СМС-пораки, електронска пошта, лажни веб-страници, мобилни апликации и социјални мрежи, со кои измамниците се обидуваат да дојдат до лични и финансиски податоци на граѓаните.
