Руските разузнавачки служби шпионирале граѓани од Европската Унија, Соединети Американски Држави и Украина преку хакирани Wi-Fi рутери, соопшти Службата за безбедност на Украина (СБУ).
Според СБУ, операцијата била координирана со ФБИ, полските разузнавачки служби и европските агенции за спроведување на законот, со цел неутрализирање на сајбер заканата.
Истражувањето покажало дека руската воена разузнавачка служба ГРУ таргетирала рутери кои не ги исполнуваат современите безбедносни стандарди. По пробивањето на уредите, напаѓачите го пренасочувале интернет-сообраќајот и станувале „посредници“, што им овозможувало да пресретнуваат лозинки, токени за автентикација и други чувствителни податоци.
„Непријателот имал намера да ги искористи собраните информации за сајбер напади, информативни саботажи и разузнавачки активности“, наведуваат од СБУ.
Особен фокус бил ставен на комуникацијата на државни службеници, припадници на украинските вооружени сили и компании од одбранбената индустрија, што укажува на сериозен обид за продор во чувствителни системи.
Овој случај повторно го отвора прашањето за безбедноста на домашните и корпоративните мрежи, особено кај уреди кои не се ажурирани и не користат современи заштитни протоколи.
