Работниците во Европската Унија во 2025 година во просек работеле 35,9 часа неделно, што е за еден час помалку во споредба со 2015 година, кога просечната работна недела изнесувала 36,9 часа, покажуваат податоците на Евростат.
Според европската статистичка агенција, најдолга работна недела имале граѓаните на Грција со просек од 39,6 часа. По неа следуваат Бугарија и Полска со по 38,7 часа, како и Литванија со 38,4 часа неделно.
Од друга страна, најкратка работна недела е регистрирана во Холандија, каде што просекот изнесува 31,9 часа. По неа се Данска и Германија со по 33,9 часа, како и Австрија со 34 часа неделно.
Податоците се однесуваат на работници на возраст од 20 до 64 години, кои работат со полно или скратено работно време.
Евростат наведува дека најдолги работни недели имаат квалификуваните работници во земјоделството, шумарството и рибарството, со просек од 42 работни часа неделно. Менаџерите работеле во просек 40,6 часа, додека вработените во вооружените сили имале просечна работна недела од 39,4 часа.
Најкратка работна недела, пак, е забележана кај елементарните занимања со 31,8 часа, помошните работници со 34 часа и услужните и продажните работници со 34,5 часа неделно.
