Судењето против 13 мажи обвинети за тешки сексуални злосторства врз иста жена, меѓу кои и нејзиниот сопруг, ќе започне во септември, соопшти британската полиција.
Според информациите, маж од Стокпорт во северозападна Англија, кој е во шеесеттите години од животот, е обвинет дека заедно со останатите обвинети организирал заговор за дрогирање на својата сопруга и нејзино силување додека била во бессознание, објави полицијата на Голем Манчестер, пренесува „Гардијан“.
Осомничениот признал вина по пет точки од обвинението за силување, како и за други тешки сексуални кривични дела. Нему му е одреден притвор, а се товари и за дополнителни кривични дела од слична природа.
Полицијата соопшти дека групата од 13 обвинети, на возраст од 28 до 73 години, се соочува со обвиненија за силување, заговор за силување и давање психоактивни супстанции со намера да се извршат кривични дела.
Идентитетот на мажот во шеесеттите години не е објавен со цел да се заштити анонимноста на неговата сопруга.
