Хрватска ќе ги олесни граничните процедури во периоди на големи метежи за да го намали времето на чекање на патниците што пристигнуваат од земјите надвор од Европската Унија.
Хрватскиот министер за внатрешни работи, Давор Божиновиќ, соопшти дека доколку времето на чекање за влез во земјата надмине 45 минути, граничната полиција ќе може привремено да ги ублажи строгите проверки што ги предвидува новиот европски Систем за влез и излез (EES).
Тоа значи дека патниците и понатаму ќе бидат евидентирани во системот, но во вакви ситуации нема да биде задолжително повторно да се земаат биометриски податоци, како што се скенирање на лицето и отпечатоци од прсти. Целта е да се забрза протокот на возила и да се намалат долгите колони на граничните премини во екот на туристичката сезона.
Од хрватското Министерство за внатрешни работи посочуваат дека оваа можност ќе се применува само кога на терен ќе се процени дека има сериозни застои и дека станува збор за привремена мерка предвидена со правилата за функционирање на системот.
И покрај олеснувањата, властите нагласуваат дека EES останува важен безбедносен механизам за Европската Унија, наменет за подобра контрола на надворешните граници и побрза размена на информации меѓу безбедносните служби.
Според официјалните податоци, со примената на системот досега биле спречени околу 5.000 обиди за нелегален влез на територијата на Европската Унија.
