За 21.000 евра менувале податоци во електронските индекси: Двајца вработени на УГД осомничени за компјутерска измама

Двајца вработени на Универзитетот „Гоце Делчев“ во Штип се осомничени дека во период од пет години незаконски менувале, бришеле и прикривале податоци во електронските индекси на студентите, со што, според Обвинителството, прибавиле материјална корист проценета на 21.000 евра. За двајцата е побаран притвор.

Основното јавно обвинителство Штип поведе постапка против раководителот на Секторот за „Е-Индекс“ и вработена како референт за студентски прашања на еден од факултетите, поради сомнение дека како соизвршители сториле злоупотреба на службената положба и овластување и компјутерска измама.

— реклама —

Според Обвинителството, незаконските активности се одвивале од 2021 до 2026 година, при што двајцата осомничени ја користеле својата службена положба за да интервенираат во информатичкиот систем на Универзитетот.

Првоосомничениот, како раководител на Секторот за „Е-Индекс“, ѝ давал насоки на второосомничената, која била задолжена за студентски прашања, да внесува невистинити податоци во универзитетскиот систем.

Со менување, бришење или прикривање информации во базата на електронските индекси, според истрагата, биле предизвикувани невистинити резултати при електронската обработка и преносот на податоците.

— реклама —

За ваквите незаконски интервенции, осомничените, според Обвинителството, се стекнувале со материјална корист која засега се проценува на 21.000 евра.

Обвинителството ги товари за кривичните дела „Злоупотреба на службена положба и овластување“, според член 353 став 4 во врска со став 1, и „Компјутерска измама“, според член 251-б став 2 во врска со став 1 од Кривичниот законик.

— реклама —

Јавниот обвинител до судијата на претходна постапка доставил предлог за определување притвор за двајцата осомничени.

Случајот следува по полициската акција за која Скопје1 претходно објави дека се спроведуваат претреси во Штип и Скопје, поврзани со сомнежи за незаконски интервенции во студентскиот информатички систем на Универзитетот „Гоце Делчев“.

МВР претходно потврди дека полициски службеници, по судска наредба обезбедена од Основното јавно обвинителство Штип, вршат претреси на повеќе локации во врска со сомнежи за злоупотреба на службената положба и незаконско навлегување во компјутерски систем.

— реклама —

Со најновото соопштение, Обвинителството за првпат ја прецизира и проценетата материјална корист од 21.000 евра, како и улогата на двајцата осомничени во наводната шема за манипулирање со електронските индекси.

Засега не е соопштено колку студентски досиеја биле опфатени со незаконските интервенции, дали биле менувани оценки, положени испити или други податоци и колку студенти евентуално имале корист од ваквите дејствија.