Потврдени претресите на УГД: Полицијата истражува злоупотреби и неовластено навлегување во компјутерски систем

Министерството за внатрешни работи за Скопје1 официјално потврди дека се вршат претреси на повеќе локации во Штип и Скопје, во рамки на истрага против раководител на информатичкиот сектор на Универзитетот „Гоце Делчев“ во Штип, осомничен за злоупотреба на службената положба и компјутерски криминал.

— реклама —

Потврдата од МВР следува откако Скопје1, повикувајќи се на извори во истрагата, прв објави дека полицијата истражува сомнителни интервенции во електронската евиденција на студентите, вклучително и менување испитни бодови, бришење оценки и овозможување запишување семестри без исполнети услови.

„Полициски службеници од Одделот за криминалистичка полиција, СВР Штип, СВР Скопје и Секторот за компјутерски криминал при МВР, по судска наредба обезбедена од Основното јавно обвинителство Штип вршат претреси на повеќе локации во Штип и Скопје во врска со сторени кривични дела ‘злоупотреба на службената положба и овластување’ и ‘оштетување и неовластено навлегување во компјутерски систем’ од страна на Р.Т. раководител на информатички сектор при Универзитетот Гоце Делчев во Штип“, соопштија од МВР за Скопје1.

— реклама —

Според претходните неофицијални сознанија на Скопје1, постојат сомнежи дека вработениот подолг период вршел незаконски измени во студентските податоци, претежно во корист на студенти од Турција, за што наводно наплаќал паричен надомест.

— реклама —

Нашите извори претходно информираа и дека при полициските активности во домот на осомничениот била пронајдена поголема сума пари. Овој податок засега не е потврден во официјалниот одговор од МВР.

Од полицијата потврдуваат дека акцијата се спроведува по судска наредба обезбедена од Основното јавно обвинителство Штип, но засега не соопштуваат дали има приведени лица, колку локации се опфатени и што е одземено при претресите.

— реклама —

„По целосно завршување на акцијата соодветно ќе ја известиме јавноста“, наведуваат од МВР.