„УГД нема да дозволи каков било сомнеж да ги наруши трудот и вредноста на дипломите на илјадниците чесни студенти и вработени“: Универзитетот за акцијата на МВР

Универзитетот „Гоце Делчев“ – Штип најави целосна соработка со Министерството за внатрешни работи и надлежното обвинителство во истрагата за сомнежи за злоупотреба на електронскиот систем за оценки од страна на вработено лице.

— реклама —

Од Ректоратот соопштуваат дека Универзитетот има нулта толеранција за корупција и каква било злоупотреба во академската заедница, додавајќи дека студентите и квалитетот на нивното образование остануваат во центарот на сите активности.

— реклама —

„УГД нема да дозволи каков било сомнеж да ги наруши трудот и вредноста на дипломите на илјадниците чесни студенти и вработени“, наведуваат од Универзитетот, уверувајќи дека наставниот процес, научноистражувачката работа и меѓународната соработка продолжуваат непречено.

— реклама —

Од институцијата нагласуваат дека остануваат посветени на транспарентноста, отвореноста и институционалниот интегритет и дека целосно ќе им помогнат на надлежните органи за брзо расчистување на случајот.

— реклама —

Реакцијата следува по информациите дека полицијата врши претреси на повеќе локации во Штип и Скопје во рамките на истрага против раководител на информатичкиот сектор при Универзитетот. Тој е осомничен за кривичните дела „злоупотреба на службената положба и овластување“ и „оштетување и неовластено навлегување во компјутерски систем“.