УГД ги суспендираше двајцата вработени осомничени дека за пари менувале податоци во електронските индекси

Универзитетот „Гоце Делчев“ во Штип презеде мерки против двајца свои вработени по одлуката на Основното јавно обвинителство Штип за поведување постапка против нив. Од Ректоратот информираат дека нивниот работен однос е ставен во мирување, а пристапот до електронскиот систем за студентски досиеја им е целосно одземен.

— реклама —

Како што наведуваат од Универзитетот, мерката ќе остане во сила до целосно расветлување на случајот. Проверките се однесуваат на ограничен број случаи поврзани со постапките за запишување студенти, а од УГД уверуваат дека досиејата и евиденцијата на останатите студенти не се засегнати.

— реклама —

Евентуално нелегитимно внесените податоци се предмет на истрагата и ќе бидат соодветно процесирани по нејзиното завршување од надлежните органи.

Од Ректоратот посочуваат дека универзитетскиот систем располага со дигитални механизми и записи преку кои може да се утврдат сите направени интервенции и евентуалната индивидуална одговорност.

— реклама —

УГД најави целосна соработка со Основното јавно обвинителство и Министерството за внатрешни работи до расчистување на случајот, а во меѓувреме нема да коментира детали поврзани со постапката.

— реклама —

Универзитетот ги повика студентите, професорите и вработените слободно и анонимно да пријавуваат сомнежи за евентуална злоупотреба на службената положба.