Полициските службеници изминатиот викенд изрекле 1.415 санкции за сообраќајни прекршоци во рамки на засилените контроли спроведени на патиштата низ државата. Најголем дел од прекршоците се однесуваат на непочитување на пропишаната брзина на движење.
Според Министерството за внатрешни работи, во периодот од 18 до 19 јули биле евидентирани 298 прекршоци за брзо возење. Воедно, поради безобѕирно управување со моторно возило од слобода биле лишени 58 лица, од кои седум управувале под дејство на алкохол, а 28 возеле без возачка дозвола.
Во текот на викендот биле одземени и 23 возила согласно член 300-б од Кривичниот законик.
Полициската статистика покажува и 199 прекршоци за неправилно паркирање, како и 47 санкции за управување возило под дејство на алкохол.
Покрај тоа, санкционирани биле 125 мотоциклисти поради неносење заштитен шлем, како и 183 учесници во сообраќајот кои не користеле сигурносен појас.
Согласно Законот за возила, од сообраќај биле отстранети 18 нерегистрирани возила и 12 возила поради техничка неисправност. Санкционирани биле и тројца возачи кои не ги исполнувале законските услови во однос на затемнувањето на стаклата на возилата.
Од МВР најавуваат дека засилените сообраќајни контроли ќе продолжат и во наредниот период, упатувајќи апел до сите учесници во сообраќајот да ги почитуваат правилата и прописите со цел зголемување на безбедноста на патиштата.
