ВМРО-ДПМНЕ преку соопштение обвини дека СДСМ и Левица го блокираат донесувањето на новиот Изборен законик, ставајќи ги, како што наведува партијата, партиските интереси пред интересите на државата и македонската дијаспора.
Од владејачката партија тврдат дека предложените измени ги содржат препораките на ОБСЕ и ОДИХР, како и предлози кои, според нив, биле усогласувани со политичките партии на работните средби во изминатиот период.
Според ВМРО-ДПМНЕ, СДСМ се противи на предлогот дијаспората да гласа по електронски пат или по пошта, бидејќи, како што тврдат, стравува од изборниот резултат кај иселениците.
Во соопштението се наведува и дека Левица, иако нејзините предлози во делот на финансирањето на изборните кампањи биле прифатени, не го поддржува договорот што бил подготвуван меѓу политичките партии.
„Целта е да се претстават како партија што не преговара и не прави компромиси, иако тоа е на штета на македонските граѓани кои живеат во странство“, наведуваат од ВМРО-ДПМНЕ.
Партијата оценува дека со блокирањето на Изборниот законик не се попречува само остварувањето на избирачкото право на дијаспората, туку се доведува во прашање и исполнувањето на реформските обврски на државата, потсетувајќи дека Европската Унија повикала на политички консензус и навремено усвојување на законските измени.
Од ВМРО-ДПМНЕ додаваат дека остануваат на ставот Изборниот законик да биде донесен со широк политички консензус, во интерес на државата, реформскиот процес и овозможувањето македонските државјани во дијаспората да гласаат по електронски пат.
