Директорката на Државниот инспекторат за животна средина, Ивана Гиновска, изјави дека за интервенцијата на водоводниот систем во Гостивар, за која се води истрага, не било побарано задолжителното одобрение од Министерството за животна средина и просторно планирање.
Таа посочи дека согласно издадената дозвола, секоја измена што операторот планира да ја направи на системот за водоснабдување мора претходно да биде одобрена од Министерството.
„Согласно дозволата која е издадена од Министерството за животна средина, секоја измена која планира да ја направи јавното комунално претпријатие треба првин да поднесе барање до Управата за животна средина, Сектор за води, за тие да го разгледаат и да дадат одобрение или да го одбијат. Станува збор за цевковод што служи за вода за пиење и тука мора да важат исклучително строги санитарни услови“, рече Гиновска.
Според неа, Министерството потврдило дека до денес не е пристигнато такво барање.
„Точка 11 од дозволата вели дека секоја измена што ќе сака да ја направи операторот е должен да побара одобрување од Министерството за животна средина. Такво барање не е пристигнато“, изјави директорката.
Гиновска нагласи дека спорниот приклучок, кој таа го нарече „див приклучок“, воопшто не бил опфатен со дозволата.
„Дивиот приклучок на отпадната вода воопшто не е во склопот на дозволата. Станува збор за процедура што е изведена на околу 800 до 900 метри надвор од последната точка од дозволата“, рече таа.
Во однос на мотивите за поставување на приклучокот, Гиновска истакна дека тоа е предмет на истрагата.
„Што им била целта да врзат цевка од отпаден водовод и како тие бактерии стигнале до домаќинствата ќе утврдат Крим-полицијата и Јавното обвинителство, кои ќе ги испитаат осомничените. Но, тоа што го знаеме е дека во никој случај ова не смеело да се направи“, изјави Гиновска.
Таа повтори дека спорниот приклучок не се наоѓал во санитарните и заштитните зони околу изворот, туку бил поставен на околу 800 до 900 метри од главниот цевковод што со вода за пиење ги снабдува Гостивар и околните населени места.
