животна средина

Победа за жителите на Страчинце – стопирана дозволата за каменолом

Првиот вицепремиер и министер за животна средина и просторно планирање, Изет Меџити, синоќа се сретна со жителите на скопското село Страчинце, кои протестираат против отворањето каменолом во нивната близина.Меџити ги информираше жителите дека министерството донело негативна одлука за барањето за започнување со работа на каменоломот. Како што изјави, оваа одлука е резултат на континуираната загриженост на населението и анализите на надлежните институции за негативните последици врз животната средина, ризикот од поплави и здравјето на луѓето.„Ова е долгоочекувана вест за жителите на Страчинце, кои со години се загрижени за можните последици од каменоломот“, рече Меџити, нагласувајќи дека дозволата за работа била издадена пред неколку години од претходни влади.Според него, следниот чекор е конечно поништување на концесијата, што ќе биде разгледано на наредната седница на Владата. Со тоа, како што додаде, прашањето ќе биде затворено, а правдата ќе биде на страната на жителите.Меџити најави и активности за повторно пошумување на овој регион.

Скопје | пред 3 месеци

Меџити: Започна искористувањето на средствата за подобрување на водната инфраструктура во општините обезбедени од ЕИБ

Првиот заменик претседател на Владата и министер за животна средина и просторно планирање Изет Меџити денес го потпиша првиот Договор за јавна набавка со избраниот најповолен понудувач за набавка на мерни инструменти за далечинско отчитување со инсталација и конфигурација на опрема за отчитување, во општина Кавадарци.Договорот e во висина од 300.000 евра и истиот ќе биде со времетраење од 12 месеци од денот на потпишување .Со ова и официјално започна имплементацијата на проектот „Подобрување на водната инфраструктура на општините во Северна Македонија“ за кој средствата во висина од 55 милиони евра се обезбедени преку заемот од Европската инвистициска банка.Со заемот се опфатени сите општини во Република Северна Македонија кои со свои приоритетни проекти аплицираат до Министерството за нивна реализација.Имплементацијата на проектот за подобрување на водната инфраструктура се одвива со забрзана динамика и во нардните денови се очекува да бидат потпишани договори за јавни набаки со најповолни понудувачи за извршување на работите во уште неколку општини во државата.

Македонија | пред 1 година

Меџити: Се грижиме за зголемување на отпорноста од поплави на Полошкиот регион

Првиот заменик претседател на Владата и министер за животна средина и просторно планирање Изет Меџити имаше обраќање на настанот за затворање на програмата „Подобрување на отпорноста по поплави во полошкиот регион“, што денес се одржа во Тетово.Подобрување на инфраструктурата за заштита од поплави со уредување на речното корито во Боговиње, изградбата и чистењето на канализацијата во Тетово и Гостивар, чистењето и стабилизацијата на речното корито на Вардар во Гостивар и Јегуновце, се само дел од значајните инвестиции на проектот за подобрување на отпорноста кон поплавите во Полог.Во рамките на проектот беа стабилизирани и 7 критични свлечишта, а беа пошумени и 42 хектари во националниот парк Шар Планина.Овој исклучително значаен повеќекомпонентен проект ја поттикна трансформациска промена во управувањето со ризикот од поплави во регионот, забрзувајќи ја промената од чисто реактивни одговори на поплави кон интегрирани системи за управување со опасностите, ранливостите и изложеноста на заедниците и добрата за да се спречат или ублажат загубите и да се олесни влијанието на идни поплави.Напоредно со инраструктурни зафати се спроведуваше едукација за зголемување на отпорноста и подготвеноста на локалните заедници за справување со елементарните непогоди и природни катастрофи.„Подобрувањето на отпорноста на поплави во полошкиот регион е многу важно прашање за зачувување на безбедноста, животната средина и одржливиот развој на овој регион“ изјави Меџити нагласувајќи дека проектот помогна да се изгради посилен и поодржлив систем за управување со ризик од поплави и создаде можности за понатамошен развој на заштитната инфраструктура во регионот.„Министерството за животна средина и просторно планирање беше во тесна координација со локалните власти и другите агенции вклучени во управувањето со поплавите, а ова партнерство обезбеди координиран пристап за решавање на проблемите поврзани со поплавите и опасноста од водите“ додаде тој.Покрај инфраструктурните интервенции, со проектот се зајакнаа и капацитетите на регионалните и националните тимови на Дирекцијата за заштита и спасување, противпожарните служби и спасувачите од Министерството за внатрешни работи. Се формираа и мрежата за заштитен и отпорен Полог како и заедничкото административно тело од сите градоначалници, чија главна задача е да се грижат за одржливоста на проектните интервенции.Одржливоста на инвестициите финансирани од Владата на Швајцарија, беа во фокусот на обраќањето на амбасадорката Вероник Улман.Постојаниот претставник на Програмата за развој на Обединетите Нации, Армен Григорјан во своето обраќање нагласи дека постигнатите резултати мора да се одржуваат и натаму и дека УНДП останува силен партнер на државата во зајакнувањето на отпорноста кон катастрофите.Проектот „Подобрување на отпорноста кон поплавите во Полошкиот регион“ го финансираше владата на Швајцарија со 12 700 000 американски долари додека дополнителни 400 000 долари вложи Министерството за животна средина и просторно планирање и 130 000 долари општините во регионот.

Македонија | пред 1 година

Заврши COP29, центарален фокус на финасирањето за климата

Во Баку, Азербеиџан, во периодот од 11-22 ноември се одржа 29-от состанок на страните на Рамковната Конвенција на ООН за климатски промени, 19-от состанок на страните на Протоколот од Кјото и 6-от состанок на страните на Договорот од Париз, заедно со 61-от состанок на помошните советодавни тела за наука и техника и за спроведување.На конференцијата, Република Северна Македонија беше претставена на највисоко ниво, со делегација предводена од претседателката на државата Гордана Силјановска Давкова во чиј состав учествуваше првиот заменик на претседателот на Владата и министер за животна средина и просторно планирање Изет Меџити и министерката за енергетика, рударство и минерални суровини, Сања Божиновска, извести Министерството за животна средина.Конференцијата на ОН за климатски промени (COP29) заврши со нова финансиска цел да им помогне на земјите да ги заштитат своите луѓе и економии од климатски катастрофи и да ги споделат огромните придобивки од внесот на чистата енергија.Со централен фокус на финансирањето за климата, COP29 обедини речиси 200 земји во Баку, Азербејџан и постигна договор што ќе овозможи:· Тројно финансирање на земјите во развој, од претходната цел од 100 милијарди американски долари годишно, до 300 милијарди долари годишно до 2035 година.· Сигурни напори на сите актери да работат заедно за зголемување на финансиите во земјите во развој, од јавни и приватни извори, до износ од 1,3 трилиони американски долари годишно до 2035 година.Формално позната како Нова колективна квантифицирана цел за климатски финансии (NCQG), беше договорена по две недели интензивни преговори и неколку години подготвителна работа, во процес кој бара сите нации едногласно да се согласат за секој збор од договорот.Оваа нова финансиска цел е осигурителна полиса за човештвото, во услови на влошување на климатските влијанија што ја погодуваат секоја земја“, рече Сајмон Стил, извршен секретар на ОН за климатски промени, додавајќи дека навреме мора да се држат ветувањата, за да се заштитат милијарди животи.Тоа ќе го одржи растечкиот бум на чистата енергија, помагајќи им на сите земји да ги споделат нејзините огромни придобивки: повеќе работни места, посилен раст, поевтина и почиста енергија за сите. Меѓународната агенција за енергија очекува глобалните инвестиции за чиста енергија да надминат 2 трилиони американски долари за прв пат во 2024 година.Новата финансиска цел на COP29 се надоврзува на претходно постигнатите чекори на глобалната климатска акција на COP27, која договори историски фонд за загуби и штети и COP28, која донесе глобален договор за транзиција од сите фосилни горива во енергетските системи брзо и правично, тројно обновливи извори на енергија и зајакнување на отпорноста на климата.COP29, исто така, постигна договор за пазарите на јаглерод - што неколку претходни COP-ови не беа во можност да го постигнат. Овие договори ќе им помогнат на земјите да ги испорачаат своите климатски планови побрзо и поевтино, и да постигнат побрз напредок во преполовувањето на глобалните емисии оваа деценија, како што бара науката.Постигнати се и важни договори за транспарентно известување за климата и адаптација, соопшти Министерството за животна средина.Република Северна Македонија се придружи кон следниве декларации:• COP29 Заложба за глобално складирање на енергија и мрежи (COP29 Global Energy Storage and Grids Pledge)• COP29 Заложба за зелени енергетски зони и коридори (COP29 Green Energy Zones and Corridors Pledge)• COP29 Декларација за засилена акција во туризмот (COP29 Declaration on Enhanced Action in Tourism)• COP29 Декларација за вода за климатски активности (COP29 Declaration on Water for Climate Action)

Македонија | пред 1 година

МЖСПП: Советничката Ирена Витина подобро да се информира, пред да изнесува невистини во јавност

Министерството за животна средина и просторно планирање остро реагира на изјавата на советничката на Град Скопје Ирена Витина, за обезбедувањето на 6-те еколошки автобуси и ја оценува како тендециозна, навредлива и со цел да се намали кредибилитетот на институцијата и на министерот Изет Меџити.„МЖСПП ја информира јавноста, а особено спомената советничка која не е доволно информирана, дека набавката на овие автобуси е само една активност од акциската ЕУ програма за еколошки стандарди и чист воздух и е дел од целосната Програма за животна средина и климатска акација во рамки на ИПА 3 помошта од ЕУ.Активностите од оваа Програма се испрограмирани на предлог на Министерството за животна средина и просторно планирање во координација со сите вклучени страни, меѓу кои е и Градот Скопје, одобрени од Владата РСМ и прифатени од страна на ЕУ Комисијата за финасирање“, велат од Министерството„Програмата за чист воздух содржи повеќе компоненти за кои повеќе пати сме информирале, се спроведува под директно управување од страна на Делегацијата на Европската Унија. Министерството за животна средина и просторно планирање е одговорно за следење на имплементацијата на Програмата и е корисник на истата, а конретно на оваа активност Градот Скопје е краен корисник.Нагласуваме дека МЖСПП ги програмира сите активности што се финансираат ЕУ инструментот ИПА, ја следи имплеменатцијата и известува кон ЕУ Комисијата за постигнатите цели од реализација на ИПА проектите.Добро би било советничката на Град Скопје Ирена Витина подобро да се информира пред да излезе во јавност со вакви невистини. Дополнително за нејзино информирање, покрај грант средставата од ЕУ, Владата на Република Северна Македонија обезбедува и национална контрибуција за целата Програма“, соопшти Министерството.

Скопје | пред 1 година

„Заштита на животната средина не бара само финансии туку и високо развиена свест“, велат од МЖСПП

Министерството за животна средина и просторно планирање и Владата на Република Северна Македонија сериозно работи на унапредување на состојбите во заштитата на животната средина воспоставувајќи мултисекторски и координиран пристап.Приоритетите на оваа Влада се јасно зацртани и согласно приоритетите креирани се и буџетите. Дополнително максимално сме посветени на привлекување на меѓународни донатори и инвеститори за обезбедување на дополнителни средства за исполнување на зацртаните цели.Во националните еколошки закони не постои правна категорија даноци, туку зборуваме за надоместоци за животната средина предвидени во еколошките закони.Преку овие надоместоци за животна средина се прибираат средства во централниот буџет на Република Северна Македонија, освен оние што се уплаќаат на самофинансирачката сметка на Министерството за животна средина и просторно планирање (МЖСПП). На сметка на МЖСПП се уплаќаат надоместоците за користење на моторни возила и пловни објекти, полагање на испити за управители со отпад, полагање на испити за оценка на влијанието врз животната средина и стратешка оцена на влијание врз животната средина, надоместоци за биоразградливи кеси и поднесување барања за А или Б Интегрирана еколошка дозвола, за измени или пренос на истите, како и за редовен надзор на инсталациите.Сите собрани средства по овој основ се враќаат во животната средина и се распределуваа континуирано на годишно ниво преку соодветни програми и тоа: Програма за инвестирање во животна средина, Програма за водите, Програма за фосилни горива, Годишна програма за финансирање на управувањето со посебни текови на отпад.Овие програми се основа за континуирано и одговорно вложување во заштита на животната средина. Со јасно дефинирани намени за распределба на средствата, ние обезбедуваме не само финансиски ресурси, туку и конкретни дејствија за постигнување на одржлив развој, систематски напредок кон обезбедување чиста и здрава животна средина во интерес на сите граѓани.Но финансирањето во заштитата на животната срдина не се обезбедува само од буџетот на МЖСПП, туку преку низа други комплементарни активности преку други министерства во Владата на Република Северна Македонија.Обезбедување на чиста вода за секој граѓанин на оваа држава, како и воспоставување на системи за одведување и пречистување на отпадните води го сметаме за еден од врвните приоритети. Ваквите инфраструктурни проекти бараат мултисекторски пристап и имплементација преку повеќе ресорни министерства и институции, бидејќи е незамисливо во 21 век се уште да имаме населени места што немаат основна инфраструктура. Меѓу нив е и Министерството за животна средина и просторно планирање, а со обезбдување на овие основни потреби на граѓаните директно се влијае на заштита на животната средина и здравјето на граѓаните, соопшти МЖСПП.Системски и долгорочно работиме на подобрување на квалитетот на воздухот. Во пресрет на грејната сезона вложивме интензивни напори во креирање на соодветни и применливи краткорочни мерки за намалувањето на загадувањето на воздухот за време целата сезона како период од годината кога редовно се соочуваме созголемени концентрации на загадувачки сусптанции. На предлог на Министерството за животна средина и просторно планирање, Владата на Република Северна Македонија, усвои Акциски план со краткорочни мерки за намалување на емисиите на загадувачки супстанции. Направивме виден напредок со изготвувањето на Наредба за воведување на мерки за намалување на емисиите на загадувачки супстанции при надминување на праг на информирање со што претходните мерки и препораки се пдигнаа на повисок степен и задолжителни. Исто така во подготовка е протокол за информирање при надминување на прагот на алрмирање во кој се јасно дефинирани обрските на вклучните институции за постапување и известување.Исто така, МЖСПП континуирано го одржува Државниот автоматски мониторинг систем за квалитет на воздух кој опфаќа 21 мониторинг станица и една подвижна распределени на територијата на целата држава. Во текот на 2024 година се спроведе постапка за набавка на резервни делови во висина од 3.594.280,00 денари за потребите на Државниот автоматски мониторинг систем за квалитет на воздух, со што ќе се овозможи сервисирање на дел од нефункционалните мерни инструменти. Сервисирање и калибрацијата на инструментите, како комплексен процес за кој е потребно подолго време се спроведуваат континуирано. Дополнително во буџетот за 2025 година предвидени се средства набавка на нова мониторинг станица, која ќе се постави во Штип, со што ќе се финализира процесот на проширување на Државниот мониторинг систем.Меѓутоа во обезбедување на чист воздух не се располага само срества од буџетот на МЖСПП и на другите министерства. Голем дел од средствата се обезбедени преку меѓународни донатори и ЕУ. Во тек е имплементација на проектот ЕУ за чист воздух, во кој Европската делегација во нашата држава вложува 10 милиони евра за 4 града во државата што во изминатиот период забележаа најголеми скокови на концентарција на загадување на воздухот: Скопје, Куманово, Тетово и Битола. Со проектот ќе се делува на намалување на загадувањето од системите за грење со замена на стари кои неефикасни котли во 70 јавни установи, ќе се донираат 6 еколошки автобуси на Град Скопје, ќе се засадат 6000 дрвни, ќе поддржи создавање на предуслови за проширување на централното греење во Скопје со изработка на Студија и набавка на инструменти за анализа на тешки метали во концентрациите на ПМ честички за Централната лабораторија.Исто така, во тек е и проект во соработка со УНДП во кој се вложени 2.5 милиони американски долари за изработка на студии за пропорционирање на извори на загадување во споментите општини и ажурирање на локалните плановите за справување со аерозагадувањето во 5 општини: Струмица, Куманово, Кавадарци, Гостивар и Струга.Голем одлив на финансиски средства имаме и за остварување на другите приоритети, како што е воспоставување на регионален систем за управување со отпад, решавање на историското загадување, заштита на природата и биодиверзитето и друга.Од тука неможе да стане збор за недоволен ангажман на државата во овој сектор. Од друга страна заштита на животната средина не бара само финансии, туку бара и високо развиена свест и одговорн однос на сите нас. Работиме посветено со сите расположиви ресурси, соопшти МЖСПП.

Македонија | пред 1 година

Донесена Наредба за воведување мерки за намалување на емисиите на загадувачки супстанции

Министерството за животна средина и просторно планирање ја информира јавноста дека Владата на Република Северна Македонија, со цел заштита на животот и здравјето на граѓаните и намалување на емисиите на загадувачки супстанции при алармантно загадување на воздухот, усвои Акциски план со краткорочни мерки за намалување на емисиите на загадувачки супстанции, согласно кој донесе Наредба за воведување на мерки за намалување на емисиите на загадувачки супстанции при надминување на праг на информирање.Во рамките на оваа Наредба, се воведуваат следниве мерки:Зајакнати контроли на возилата: Министерството за внатрешни работи – Сообраќајна полиција ќе спроведе засилени и вонредни контроли на возилата со цел утврдување на техничката исправност на возилата за емисијата на испусните гасови. Ова ќе помогне во намалување на загадувањето од сообраќајот.Посебен сообраќаен режим за тешки товарни возила: Општините и Градот Скопје, во соработка со Министерството за внатрешни работи, ќе обезбедат посебни сообраќајни режими за тешките товарни возила, насочувајќи ги кон обиколни патишта со цел да се намали сообраќајот во урбаните средини.Забрана за дотур на стока и транспорт на градежни машини: Општините и Градот Скопје ќе воведат забрана за дотур на стока и транспорт на градежни машини како што се багери, булдожери и виљушкари во периодот од 7:30 до 18:00 часот. Оваа мерка е со цел да се намали сообраќајниот метеж и емисиите во најфреквентните часови. Министерството за внатрешни работи е задолжено да изврши контрола на спроведувањето на оваа мерка.Намалување на употребата на службени возила: Сите органи на државна управа, агенции, фондови, бироа, заводи, јавни претпријатија и акционерски друштва во државна сопственост, како и единиците на локалната самоуправа, се задолжени да ја намалат употребата на службените возила до 50%. Оваа мерка има за цел да го намали службениот сообраќај и емисиите од него.Ослободување од работни обврски на ранливи групи: Министерството за економија и труд, во соработка со Министерството за здравство, ги задолжува сите правни субјекти (работодавци) да ги ослободат од работни обврски:Бремените жени; лицата постари од 60 години; лицата со малигни заболувања, хронична астма, прележан миокарден инфаркт или мозочен удар, без оглед на возраста, со препорака од матичен лекар.Реорганизација на работното време и обезбедување заштитни маски: Сите правни субјекти (работодавци) се задолжени да го реорганизираат работното време за лицата кои работат на отворено. Работните активности треба да се извршуваат во периодот од 11:00 до 17:00 часот. Дополнително, работодавците се должни да обезбедат заштитни маски тип KN95 или најмалку FFP2 за своите работници.Намалување на капацитетот на инсталациите со А интегрирана еколошка дозвола: Инсталациите кои поседуваат А- интегрирана еколошка дозвола се задолжени да го намалат капацитетот на производство. Притоа, треба да се внимава со ограничувањата да не се прекине или значително намали технолошкиот процес кој се одвива континуирано, или дејноста која би предизвикала значителна штета за правниот субјект или негативно влијание врз животната средина и јавните услуги. Исклучок од оваа мерка се инсталациите кои произведуваат топлинска и електрична енергија.Вонредни контроли на инсталациите со А интегрирана еколошка дозвола: Државниот инспекторат за животна средина ќе започне со вршење на вонредни контроли на инсталациите со А интегрирана еколошка дозвола. Ќе се спроведат контролни мерења на емисиите во воздух со акредитирани методи за да се утврди дали се применуваат пропишаните услови и мерки во дозволите.Вонредни контроли на правните субјекти со Б интегрирана еколошка дозвола и елаборати: Државниот инспекторат за животна средина и овластените инспектори за животна средина се задолжени да започнат со вршење на вонредни контроли на правните субјекти кои поседуваат Б интегрирана еколошка дозвола и елаборати, со цел да се осигура усогласеноста со еколошките стандарди.Вонредни контроли на градилишта: Државниот инспекторат за градежништво и урбанизам и надлежните општински инспекторати ќе започнат со вршење на вонредни контроли на градилишта, со цел да се утврди почитувањето на прописите за заштита на животната средина и намалување на емисиите на прашина и други загадувачи.Горенаведените мерки ќе се применуваат во случаи на надминување на праговите на алармирање дефинирани во Уредбата за гранични вредности за нивоа и видови на загадувачки супстанци во амбиентинот воздух и прагови на алармирање, рокови за постигнување на граничните вредности, маргини на толеранција за гранична вредност, целни вредности и долгорочни цели.Министерството за животна средина апелира до сите надлежни институции, органи, правни субјекти и граѓани за целосно почитување и имплементација на наведените мерки. Заедничката акција е неопходна за заштита на здравјето на граѓаните и за подобрување на квалитетот на воздухот во нашата земја.Министерството ќе продолжи со активно следење на состојбата со квалитетот на воздухот и ќе ги информира граѓаните за понатамошните мерки и активности. Сите заинтересирани страни се повикани да соработуваат и да придонесат кон успешна реализација на мерките.

Македонија | пред 1 година

Меџити: Невладините организации, значајни партнери во заштита на животната средина

Првиот вицепремиер и министер за животна средина и просторно планирање Изет Меџити учествуваше на годишната конференција на граѓански организации на тема „Соработката помеѓу Владата и граѓанското општество”, организиран од националниот форум на Цивика Мобилитас.На тематска дискусија со министри во Владата, грантистите на програмата Цивика Мобилитас, поставуваа прашања според тематските приоритети и надлежности по ресори. На прашањето за политиките на Владата за унапредување на меѓуетничките односи во државата Меџити истакна: „Во овие први месеци по промената на власта кога сеуште трае процесот на транзиција, се создаде впечаток дека меѓуетничките односи се нарушени. Сакам да бидам јасен: мултиетничноста е реалност на нашата држава, со неа живееме, твориме, дејствуваме. И во многу постари и поразвиени демократии од нашата, сеуште постојат предизвици кон основните постулати врз кои почива државата и таквите предизвици ќе продолжат да постојат. Тоа е така затоа што станува збор за демократија, за постоење на различно мислење, за можност за изразување на истото“ и додаде дека она што е битно е да се сочува умереноста во мнозинството, а екстремистите кои се на маргините отсекогаш ги имало и ќе ги има.Во однос на секторските политики во животната средина, акцентот невладините организации го ставија на состојбата со природните езера, Охридското и Преспанското, за што Меџити информираше дека Нацрт Закон за прогласување на Охридското Езеро за споменик на природата и Предлог Законот за прогласување на Студенчишко блато во Охрид за заштитено подрачје во категорија IV парк на природата се вратени во почетна фаза од страна на собраниската комисија надлежна за заштита на животна средина, заради дополнителна доработка на предлог законите, со цел изнаоѓање на поквалитетни решенија во однос на заштитата на Охридскиот регион и неговото исклучително универзално природно добро.Во однос на исполнувањто на препораките на мисијата на УНЕСКО за заштитеното подрачје Охрид, тој истакна дека постапувајќи по Одлуката на Комитетот за светско наследство од Ријад, надлежните институции, вклучувајки го и Министерството за животна средина и просторно планирање, ги спроведуваат препораките од Комитетот за светско наследство со цел намалување и отстранување на факторите кои негативно влијаат на квалитетот на животот на нашите граѓани.„Визија споделена меѓу сите учесници“, рече Меџити „е да се зачува исклучителната универзална вредност на доброто, препораките од Комитетот за светско наследство при УНЕСКО кои силно инсистираa државите членки да ги имплементираат итните мерки за да се нагласат постојните закани и да се спречи појавата на нови закани кои би влијаеле врз исклучителната универзална вредност“.Исто така, Меџити сподели информации за степенот на имплементација на регионалниот систем за управување со отпад по региони, како и пречистителната станица за отпадни води во Скопје.„ Во моментот се во тек подготвителните работи и се прават дизајни. Очекуваме дека градежните работи за пречистителната станица Скопје ќе започнат до крајот на годинава. Согласно договорот за градба, изградбата трае три години и дополнителни две години период на пробна работа. Доколку сите активности се одвиваат согласно предвидената динамика и рокови, пречистителната станица за отпадни води за Скопје ќе биде во функција во 2030 година“ информираше Меџити.Првиот вицепремиер и министер за животна средина и просторно планирање Меџити се заблагодари на амбасадорката на Швајцарската Конфедерација во Република Северна Македонија, Вероник Улман, која е покровител на настанот и на организаторот Александар Кржаловски од тимот на Цивика Мобилитас, нагласувајќи дека очекува добра соработка со еколошките невладини организации како партнери кон заштитата на природата и нејзината одржливост.

Македонија | пред 1 година

Финализирани активностите од проектот за идентификување на нови Натура 2000 подрачја и имплентација на CITES

Денеска, во Скопје, се одржа завршниот настан на проектот финансиран од ЕУ, „Подобрување на капацитетите за Натура 2000 и CITES.“, кој е клучен во зајакнување на капацитетите за заштита на животната средина и зачувување на природата во нашата држава. На настанот беа претставени достигнувањата и резултатите од активностите за идентификација на нови зони кои станаа дел еколошката мрежа на Европската Унија, наречена Натура 2000.Во своето воведно обраќање, заменик министерката за животна средина и просторно планирање Ане Лашкоска изрази задоволство што со овој проект, кој активно се спроведува од јуни 2022 година, се постигна подобра заштитата на природата и биодиверзитетот во нашата држава, што е и еден од клучните столбови на Европскиот зелен договор и Зелената агенда за Западен Балкан.- Главната цел на проектот беше зајакнување и подобрување на административните капацитети за хармонизација и имплементација на ЕУ законодавството за зачувување на природата. Во рамки на проектот беа спроведени активности за подобрување на законска и институционална рамка, преку подготовка на нацрт стандардни формулари за податоци за потенцијалните НАТУРА 2000 подрачја, нов Закон за CITES, како и зајакнување на административните капацитетите на национално ниво – истакна Лашкоска, додавајќи дека Министерството ќе остане посветено на овие активности и ќе се заложува да обезбеди одржливост на проектните резултати.Вкупната вредност на проектот „Подобрување на капацитетите за Натура 2000 и CITES“ изнесува 2.214.100 евра, и е составен од две главни компоненти со кои се определуваа подрачјата и се изготвуваше соодветно законодавство. Проектниот тим го сочинуваше конзорциумот NIRAS заедно со Полското друштво за заштита на птиците, EFTAS, Stichting BirdLife, како и нашите македонски претставници во конзорциумот Фармахем и Македонското еколошко друштво.На завршниот настан присуствуваше и шефот на Делегацијата на Европската Унија Стефан Худолин.

Македонија | пред 1 година

Меџити се сретна со регионалниот директор на УНОПС за Европа и Централна Азија: Задоволен сум што заедно реализираме значајни проекти со директно влијание врз заштитата на животната средина

Првиот заменик претседател на Владата и министер за животна средина и просторно планирање Изет Меџити денес на работен состанок прими делегација од Канцеларијата на Обединетите нации за проектни услуги, УНОПС, предводена од регионалниот директор на УНОПС за Европа и Централна Азија, Тим Лардднер.Меџити му посака добредојде на Ларднер во нашата земја, истакнувајќи благодарност за соработката и поддршката која УНОПС ја дава за Република Северна Македонија.„Задоволен сум што заедно реализираме значајни проекти со директно влијание врз заштитата на животната средина, а нашата соработка со UNOPS и проектот "ЕУ за чист воздух“ е важен чекор во нашите напори за борба против загадувањето и подобрување на квалитетот на воздухот во нашата земја“, рече Меџити, додавајќи дека загадувањето на воздухот е еден од најголемите еколошки предизвици со кои се соочуваме, ние како држава и регионот.Преку проектот „ЕУ за чист воздух“ на Европската Унија и во соработка со УНОПС, добивме нови можности за имплементација на мерки кои директно ќе влијаат на подобрување на здравјето на граѓаните и создавање почиста животна средина. Како одличен пример за успешноста на соработката е и проектот во ОХИС за санација на малата депонијата со линдан, се согласија Меџити и Ларднер.„Овој проект е од исклучителна важност, бидејќи се занимава со сериозен еколошки проблем, чистење на површина истриски загадена со штетни органски материи“, изјави Меџити.Регионалниот директор на УНОПС за Европа и Централна Азија, Тим Ларднер на средбата со Меџити изјави дека УНОПС е подготвен да даде поддршка во евроинтегративниот процес на земјата, во делот на изготвување и реализација на приоритени проекти и активности во согласност со националните приоритети за заштита на животната средина.

Македонија | пред 1 година

МЖСПП ги интензивира активностите за чист воздух

Со почетокот на грејната сезона и промента на временските услови се создаваат услови за зголемување на загадувачките честички на воздухот што влијаат врз здравјето на луѓето. Министерството за животна средина и просторно планирање работи во континуитет на реализација на долгорочните мерки за намалување на аерозагадувањето, но оваа година проектираше низа дополнителни конкретни активности и ги насочи сите расположиви ресурси во навремено преземање на конкретни мерки со кои ќе се постигне поголем ефект во намалување на аерозагаденоста.Во Министерството е формирана интерна работна група за чист воздух од претставници на сите релеватни сектори од институцијата, која ќе ѝ предложи на Владата Акциски план со конкретни краткорочни и долгорочни активности чија цел е да забрза процесот на постигнување на видливи резултати во подобрувањето на квалитетот на воздухот.За квалитетот на воздухот мора сите да преземеме нешто, а Министерството за животна средина и просторно планиарње оваа сезона делува проактивно и со предлог мерки и со мотивирање на различните чинители да се подготват и посериозно да делуваат во пресрет на зимската сезона.Направен е План за посета и инспекторирање на индустриските капацитети што поседуваат А-Интегрирана еколошка дозвола. Посетите ќе се одвиваат по плански региони во државата, а екипата ќе биде составена од претставници на Државниот инспекторат за животна средина и од Министерството. Целта не е само да се изврши контрола на индустрискот капацитет дали ги исполнува обврските од дозволата, туку и да се влијае на подигање на свеста и подготвеноста на компаниите во пресрет на зимската сезона да преземат и дополнителни мерки со кои би влијаеле позитивно врз квалитето на воздухот.Министерството за животна средина и просторно планирање апелира до граѓаните и институциите, компаниите и до сите општествени чинители за совесно однесување во однос на начините на затоплување, чистење на оџаците, фрлање на отпадот, палење на депониите, користењето на возила, градежните работи на отворено, палењето на стрништа и слично, со цел сите заедно да дадеме свој придонес кон обезбедување на почиста и поздрава животна средина и подобрување на квалитетот на животот за сите нас.Министерството ја континуирано ја следи состојбата со квалитетот на воздухот, редовно ги информира граѓаните и ќе преземе и други дополнителни активноси за што јавноста ќе бид правовремено информирана.

Македонија | пред 1 година

„Се прави регионална депонија по европски стандарди“, Министерството за животна средина бара разбирање од жителите на Кочани кои се уште го блокираат патот

Жителите од Кочани продолжуваат со протести на патот кон Пониква, кој води и кон комуналната депонија во близина на селото Бели. Како што најавија блокадите ќе траат деноноќно сè до целосно исполнување на нивните барања.„Во моментот сообраќајот се одвива непречено по една коловозна лента кон Пониква, исто така и кон село Бели, а од страна на граѓаните е најавено дека единствено до депонијата ќе бидат пропуштени возила од КЈП Водовод Кочани, но не и возила од други општини“, извести АМСМ.Според жителите чадот од градската депонија во Кочани изминатиот период беше причина за повеќе предупредувачки протести на жителите, кои подолг временски период се соочуваат со овој проблем, а истиот стана сериозен откако на Градската депонија започна да се депонира и отпадот од соседните општини, како дел од обврските што се наметнаа со проектот изградба на регионална депонија кај светиниколско Мечкуевци.Од Министерството за животна средина и просторно планирање ги повикуваат жителите на Кочани да имаат разбирање оти државата, како што велат, е длабоко навлезена во процесот на воспоставување на регионален систем за управување со отпадот во Источниот и Североисточниот регион, што треба да резултира со трајно, одржливо и безбедно управување со отпад.„Самиот процес е комплексен и опфаќа повеќе работни задачи. Досега се набавени возила и опрема за собирање на отпадот за сите општини во двата региона (вкупно 18) во вредност од 8 милиони евра. Во моментов во тек е затворање на нестандардните депонии и ѓубришта во Источниот Регион, се очекува во најбрзо време да започне и во Североисточниот Регион – Прва фаза (околу 8 милиони евра), а претстои изградба на Централна постројка за управување со отпад која се состои од погон за селектирање, постројка МБТ, депонија, постројка за композитор, зелена точка за Источен и Североисточен регион во Св.Николе и шест локални капацитети за управување со отпад – претоварни станици, постројки за компостирање и зелени пунктови за Источниот и Североисточниот регион“, соопшти МЖСПП.Оттаму посочуваат дека последните две активности се со вкупна вредност од повеќе десетици милиони евра, за што постапката за јавна набавка е објавена и се очекува договорот да биде склучен, по што се очекува во првата половина од 2025 година да започнат градежните работи. Предвидениот рок за завршување на градежните работи е 18 месеци.Во втора фаза, следува затворање на сите нестандардни депонии во двата региони, по што целокупниот отпад ќе се одлага на Централната депонија во Св. Николе преку трансфер станиците.Од министерството нагласуваат дека обврската за управување на општинските нестандардни депонии кои во првата фаза ќе останат отворени (се до изградбата на Централната постројка во Св. Николе) и имаат обврска да го примаат отпадот од веќе исчистените и затворени нестандардни депонии во одреден број општини, останува на општините и јавните комунални претпријатија, а Владата останува посветена да ги помогне со цел воспоставување регионалниот систем според највисоките европски и светски стандарди.„Во однос на депонијата во Кочани информираме дека таа има обврска да го прима отпадот од општините Виница, Чешиново, Облешево и Зрновци. Свесни за недоволните капацитети за управување со депонијата на Јавното комунално претпријатие што неодамна резултираше со палење на отпадот на кочанската депонија, како Влада излеговме во пресрет и обезбедивме поддршка со механизација за безбедно тековно управување со локацијата во Кочани“, велат од МЖСПП.Според министерството, пожарите кои се случуваа во минатото не зависат од количината на отпадот, туку од несоодветното управување со локацијата.За ресорното министерство, забраната за пристап до локацијата за депонирање не е решение и не оди во прилог на почиста животна средина туку само ја влошува состојбата за која веќе се потрошени неповратни средства.

Македонија | пред 1 година

Лашкоска: Мерките за намалување на ризикот од катастрофи на локално ниво се од суштинско значење за заштита на заедниците и зајакнување на отпорноста од идни катастрофи

Заменик министерката за животна средина и просторно планирање Ане Лашкоска учествуваше на сесијата наречена „Лабораторија за учење за да ги направиме градовите отпорни 2030: Акции за намалување на ризици од катастрофи на локално ниво“ што денес се одржа во рамки на Европската платформа за намалување на ризици од катастрофи, во Будва, Црна Гора.Сесијата модерирана од Армен Григоријан постојан претставник на УНДП во нашата држава, на која покрај Лашкоска учестуваа и Жоао Динис, координатор на Канцеларијата на Каскаис Амбиенте - EMAC, Каскаис, Португалија и Бахтијар Оспанов, виш експерт од Центар за вонредни ситуации и намалување на ризикот од катастрофи (CESDRR), беше одлична можност за размена на искуства и предизвици за операционализацијата на локално ниво на намалувањето на ризикот од катастрофи и адресирање на финансиските и институционалните бариери низ регионите.Во своето излагање, заменик министерката Лашкоска ги претстави напорите на локални заедници во Македонија кои во изминатиот период беа најизложени на ризици од катастрофи и начините на справување со нив и истакна дека заложбите на општините за зајакнување на отпорноста кон климатските промени напредуваат.„Мерките за намалување на ризикот од катастрофи (DRR) на локално ниво се од суштинско значење и тие ќе станат само покритични бидејќи климатските промени продолжуваат да се интензивираат. Со ставање приоритет на DRR, можеме да ги заштитиме заедниците и да ја зајакнеме отпорноста против идни катастрофи“ истакна Лашкоска.Иницијативата „Да ги направиме градовите отпорни 2030“ (MCR2030), вклучува над 1.700 градови, ги поддржува локалните власти во зајакнувањето на напорите за намалување на ризикот од катастрофи (DRR) и отпорност на климата, придонесувајќи директно за постигнување на Целта 11 за одржлив развој, како и други глобални рамки вклучувајќи ја Рамката Сендаи за намалување на ризикот од катастрофи, Парискиот договор и Новата урбана агенда.MCR2030 служи како платформа за споделување искуства, градење капацитети и поттикнување иновативни решенија во градовите и урбаните средини. Иницијативата, исто така, се усогласува со Европското партнерство за отпорност, кое има за цел да ја подобри соработката меѓу градовите во Европа за да ги интегрира стратегиите за отпорност во плановите за урбан развој и да ги сподели најдобрите практики.

Македонија | пред 1 година

Лашкоска: Намалување на ризиците од катастрофи бара широка соработка и инклузивност

Заменик министерката за животна средина и просторно планирање Ане Лашкоска денес учествуваше на министерска тркалезна маса на тема: „Зголемување на активностите за намалување на ризикот од развој на ризици во средината“, организирана во рамки на Европската платформа за намалување на ризици од катастрофи, што се одржува во Будва, Црна Гора.Во присуство на министри и шефови на делегации на високо ниво од регионот и од Европа и централна Азија, претставници на ОН и избрани засегнатите страни, заменик министерката Лашкоска ги претстави националните напори за намалување на ризикот од климатските катастрофи .„Еден од клучните предизвици со кои се соочуваме е да се осигура дека намалувањето на ризикот од катастрофи, климатската адаптација и управувањето со животната средина се спроведува кохерентно во сите гранки на власта. Овие области се неразделни и треба да се уредуваат соодветно“ истакна Лашкоска додавајќи дека се потребни интегрирани закони, регулативи и рамки на политики кои ќе обединат различни сектори - животна средина, енергија, земјоделство, урбанистичко планирање, инфраструктура, финансии, образование и социјална заштита - под обединета и инклузивна визија за намалување на ризикот и отпорност на климата на нашите заедници.Таа истакна дека ја смета за особено важна регионалната соработка, бидејќи катастрофите не познаваат граници, а колективна способност да споделуваме знаење, ресурси и најдобри практики е од витално значење.Европската платформа за намалување на ризици од катастрофи ја оцени како исклучително важна и добра можности да се споделуваат знаења, да се соработува и да се координира за стратегиите за намалување на ризиците што ги надминуваат националните граници.Тркалезната маса се затвори со донесување на политичка декларација која не е само резиме на дискусиите, туку ја изразува посветеноста на државите за заедниците. Таа е моќна порака до глобалната заедница, ги зајакнува врските помеѓу Рамката Сендаи и Конвенциите во Рио и придонесува кон Глобалната платформа за намалување на ризикот од катастрофи од 2025 година.

Македонија | пред 1 година

Меџити: Зелената агенда, можност за голема координирана еколошка трансформација на регионот

Првиот вицепремиер и министер за животна средина и просторно планирање Изет Меџити, денеска присуствуваше и ја отвори годинешната конференција на Македонското здружение за енергија од обновливи извори, МАРЕС.Меџити во своето обраќање ја истакна важноста на Зелената агенда за Западен Балкан како пресвртница за регионот, но и поединечно за земјите, поради можноста што ја нуди за голема координирана трансформација на регионот.„Со ваквата трансформација, ефикасноста на ресурсите, заштитата на природата и климатската акција ќе се постават во центарот на сите економски активности и предизвиците ќе се претворат во можности“, изјави Меџити, додавајќи дека кластерот 4 се однесува на Зелената агенда и одржливата мобилност, и како таков, овозможува директнен увид во поврзаноста помеѓу секторите, особено секторот енергетика, транспорт и животната средина, каде е опфатено законодавството од секторите врз кои секторот енергетика има директно влијание - квалитетот на воздухот и биодиверзитетот, водните ресурси.Првиот вицепремиер информираше дека во однос на придонесот по мерки, најголемо учество во бројот на нови домашни зелени работни места имаат доградба на постоечки станбени згради со 42%, изградба на пасивни куќи 21%, обновливи извори на енергија без стимулации 6% и соларни термални колектори 8%.„Употребата на обновлива енергија создава работни места во производството, инсталацијата и одржувањето, поттикнувајќи го економскиот раст и иновациите во енергетската област. Дополнително, со диверзификација на изворите на енергија, обновливите извори ги прават енергетските системи помалку зависни од увезените фосилни горива, со што се подобрува енергетската безбедност“, додаде Меџити.Меџити на годинешната конференција на Македонското здружение за енергија од обновливи извори, МАРЕС изрази поддршка на интервенциите во примената на обновливите извори на енергија, условена со ненарушување на животната средина и природата.

Македонија | пред 1 година