Минималната синдикална кошничка за мај изнесува 68.743 денари, покажуваат најновите пресметки на Сојузот на синдикатите на Македонија.
Според податоците, толку средства се потребни за покривање на основните месечни потреби на просечно четиричлено семејство кое живее во сопствен дом. Во споредба со април, кога вредноста на кошничката изнесувала 68.797 денари, трошоците се намалени за 54 денари.
Најголем дел од домашниот буџет и натаму оди за храна и пијалоци – 25.475 денари или 37,1 проценти од вкупните трошоци.
За домување, вода, струја и греење се потребни 6.338 денари, додека за облека и обувки семејствата треба да издвојат 6.334 денари.
Од ССМ посочуваат дека доколку едно семејство живее во изнајмен стан од 60 квадратни метри, тогаш вредноста на минималната синдикална кошничка се зголемува на 84.117 денари. Во тој случај, само трошоците за домување и режии достигнуваат 21.713 денари.
