Забрани за тешки возила на повеќе планински превои, сообраќајот се одвива по влажни коловози

Сообраќајот на државните патишта во земјава се одвива по влажни коловози, а за тешки товарни возила е воведена забрана за сообраќај на повеќе планински превои, информираат од АМСМ.

— реклама —

Забраната за тешки товарни возила важи на превоите Плетвар, Ѓавато, Пресека, Маврово–Дебар–Струга, како и на граничниот премин Ќафасан. Интензитетот на сообраќај надвор од градските средини е умерен, додека на граничните премини, од македонска страна, засега нема подолги задржувања за влез и излез од државата.

— реклама —

Од АМСМ потсетуваат дека до 15 март 2026 година е на сила законската обврска за задолжително поседување зимска опрема во возилата, без разлика на моменталните временски услови.

Возачите се повикуваат на зголемена внимателност, прилагодување на брзината и почитување на сообраќајната сигнализација, особено на патиштата низ котлините, речните долини и клисурите, каде што постои опасност од одрони. Посебно внимание се препорачува на делниците Катланово–Велес, Маврово–Дебар–Струга, Виница–Берово и Кочани–Делчево.

— реклама —

Патниот правец Охрид–Ресен преку Националниот парк Галичица останува затворен за сообраќај за сите видови возила до 31 март 2026 година.

Воедно, на повеќе патни правци има времен изменет режим на сообраќај поради градежни активности. Измени има на Коридор 10 на делницата Прилеп–Битола, на скопската обиколница кај Волково и Кондово, на експресниот пат Крива Паланка–Страцин, како и на регионалните и магистралните патишта каде се изведуваат санации и рехабилитации, со сообраќај регулиран со сигнализација, знаменца или семафори.