„Законот за нулта толеранција за корупција и слободата на медиумите ќе бидат првите задачи на новата влада“, вели Филипче

Претседателот на СДСМ, Венко Филипче, во интервју за српскиот медиум Нова најави дека Законот за нулта толеранција кон криминалот и корупцијата, како и слободата на медиумите, ќе бидат првите задачи на идната влада.

„Законот за нулта толеранција кон криминалот и корупцијата и слободата на медиумите – тоа ќе бидат првите задачи на идната влада. Влада која ќе работи во интерес на Македонија и нејзините граѓани, а не на странски служби и туѓи држави“, изјави Филипче.

— реклама —

Тој посочи дека предложениот закон треба да биде основа за создавање на поширок граѓански фронт што ќе ги обедини сите проевропски и независни партии во државата.

„Претставуваме нов закон кој ќе биде основа за еден голем граѓански фронт. Тој закон ги обединува сите проевропски и независни партии во Македонија. Покрај партиите, имаме и голем број луѓе кои се приклучија во оваа борба против организираната криминална група ВМРО – млади, поединци, експерти, невладин сектор“, рече Филипче.

— реклама —

Тој нагласи дека законот е инспириран од естонскиот модел за борба против корупцијата.

— реклама —

„Станува збор за закон за нулта толеранција кон криминалот и корупцијата, по примерот на естонскиот модел. Естонија беше земја слична на нас, која во посткомунистичкиот период се бореше со криминал и корупција, исто како што ние се бориме денес. Ако моделот успеал кај нив, тогаш може да успее и кај нас“, истакна лидерот на СДСМ.

Во интервјуто, Филипче оцени дека во последните две години е забележан пад на медиумските слободи и институционалниот напредок во државата.

— реклама —

„Доволно е да се погледне каде беше Македонија на листите за медиумски слободи во времето на Груевски, а каде за време на владата на СДСМ. За само две години ВМРО повторно успеа да го урне тој напредок“, рече Филипче.

Тој додаде дека за СДСМ слободата на медиумите останува еден од клучните приоритети и најави дека „ослободувањето на медиумите“ ќе биде една од првите мерки по евентуална победа на следните избори.